bewafa se gala kiya na gaya

bevafā se galā kiyā na gayā

lutf-e-ġham be-maza kiyā na gayā

laakh chāhā bane vo merā ghar

sang ko aa.ina kiyā na gayā

us ne ġham hī diye mohabbat meñ

pās-e-ahd-e-vafā kiyā na gayā

raat bhar jaage intizār kiyā

us se vā'da vafā kiyā na gayā

vo judā ham se ho gayā lekin

us ko dil se judā kiyā na gayā

ishq meñ ġham sahe magar phir bhī

ishq se dil burā kiyā na gayā

baad muddat ke jab mile us se

koī shikva gila kiyā na gayā

but tarāshe hazār aazar ne

but ko ġham-āshnā kiyā na gayā

va.az kyā kyā diye na vaa.iz ne

rind ko pārsā kiyā na gayā

jaan de dī kisī ke ġham meñ 'zafar'

aur is ke sivā kiyā na gayā

bewafa se gala kiya na gaya

lutf-e-gham be-maza kiya na gaya

lakh chaha bane wo mera ghar

sang ko aaina kiya na gaya

us ne gham hi diye mohabbat mein

pas-e-ahd-e-wafa kiya na gaya

raat bhar jage intizar kiya

us se wa'da wafa kiya na gaya

wo juda hum se ho gaya lekin

us ko dil se juda kiya na gaya

ishq mein gham sahe magar phir bhi

ishq se dil bura kiya na gaya

baad muddat ke jab mile us se

koi shikwa gila kiya na gaya

but tarashe hazar aazar ne

but ko gham-ashna kiya na gaya

waz kya kya diye na waiz ne

rind ko parsa kiya na gaya

jaan de di kisi ke gham mein 'zafar'

aur is ke siwa kiya na gaya