bhaDak rahi hai bahut dil mein aatish-e-bebak

bhaḌak rahī hai bahut dil meñ ātish-e-bebāk

bujhā sakegā use kaise dīda-e-namnāk

bahut hī sāda-dil-o-sāda-taur haiñ ham log

fareb-kār zamāna hai shātir-o-chālāk

‘avām bar-sar-e-paikār taḳht-e-shāhī se

nizām-e-zar huā jaatā hai ab ḳhas-o-ḳhāshāk

vo din bhī kyā the ki 'ilm-o-hunar tashaḳhḳhus thā

zamīñ pe apnā tasarruf to zer-e-pā aflāk

nizām-e-zar ko abhī pheñk do samundar meñ

hai is kī fikr meñ badbū vujūd bhī nāpāk

ḳhudā ne apnī hī fitrat pe jis ko ḳhalq kiyā

maiñ sochtā huuñ vo insāñ huā hai kyoñ saffāk

mire suḳhan se taġhāful na kar ki duniyā meñ

hai ahl-e-dil ke liye ye sahīfa-e-idrāk

yahī to log haiñ sarḳhail 'ishq-o-mastī ke

charāġh-e-ārzū dil meñ to hai garebāñ chaak

zamīñ kā bojh haiñ insāniyat pe dhabba haiñ

hai jin kā maqsad-e-hastī faqat zar-o-imlāk

maiñ ḳhud zamīñ se mujhe āsmāñ se kyā matlab

maiñ ḳhāksār mirī zindagī kā faḳhr bhī ḳhaak

zamīn-zādoñ se māyūs ho gayā 'rāhī'

ki us kī āh-o-fuġhāñ ab hai jānib-e-aflāk

bhaDak rahi hai bahut dil mein aatish-e-bebak

bujha sakega use kaise dida-e-namnak

bahut hi sada-dil-o-sada-taur hain hum log

fareb-kar zamana hai shatir-o-chaalak

‘awam bar-sar-e-paikar taKHt-e-shahi se

nizam-e-zar hua jata hai ab KHas-o-KHashak

wo din bhi kya the ki 'ilm-o-hunar tashaKHKHus tha

zamin pe apna tasarruf to zer-e-pa aflak

nizam-e-zar ko abhi phenk do samundar mein

hai is ki fikr mein badbu wujud bhi napak

KHuda ne apni hi fitrat pe jis ko KHalq kiya

main sochta hun wo insan hua hai kyon saffak

mere suKHan se taghaful na kar ki duniya mein

hai ahl-e-dil ke liye ye sahifa-e-idrak

yahi to log hain sarKHail 'ishq-o-masti ke

charagh-e-arzu dil mein to hai gareban chaak

zamin ka bojh hain insaniyat pe dhabba hain

hai jin ka maqsad-e-hasti faqat zar-o-imlak

main KHud zamin se mujhe aasman se kya matlab

main KHaksar meri zindagi ka faKHr bhi KHak

zamin-zadon se mayus ho gaya 'rahi'

ki us ki aah-o-fughan ab hai jaanib-e-aflak