bhaDak uTha hai jo ab shoala-o-sharar ki tarah

bhaḌak uThā hai jo ab sho.ala-o-sharar kī tarah

ḳhizāñ-rasīda mirā zehn thā shajar kī tarah

nihāl-e-zīst meñ tanñe lage ġhamoñ ke samar

ki sar ḳhamīda haiñ ham shāḳh-e-bārvar kī tarah

hikāyat-e-lab-o-ruḳhsār kā ye vaqt nahīñ

ki jal rahā hai har ik zehn dopahar kī tarah

vo baat aql se jo rabt hī nahīñ rakhtī

diloñ meñ baiTh ga.ī harf-e-mo'tabar kī tarah

ham apne hī sadaf-e-lā-shu.ūr meñ haiñ nihāñ

khule sadaf to chamakne lageñ guhar kī tarah

hamāre jaate hī ubhregā āftāb yahāñ

shafaq meñ Dūbeñge ham kaukab-e-sahar kī tarah

umīd-e-faiz na rakh mun.imoñ se ai 'kausar'

chaman meñ rahte haiñ ye shāḳh-e-be-samar kī tarah

bhaDak uTha hai jo ab shoala-o-sharar ki tarah

KHizan-rasida mera zehn tha shajar ki tarah

nihaal-e-zist mein tanne lage ghamon ke samar

ki sar KHamida hain hum shaKH-e-barwar ki tarah

hikayat-e-lab-o-ruKHsar ka ye waqt nahin

ki jal raha hai har ek zehn dopahar ki tarah

wo baat aql se jo rabt hi nahin rakhti

dilon mein baiTh gai harf-e-mo'tabar ki tarah

hum apne hi sadaf-e-la-shuur mein hain nihan

khule sadaf to chamakne lagen guhar ki tarah

hamare jate hi ubhrega aaftab yahan

shafaq mein Dubenge hum kaukab-e-sahar ki tarah

umid-e-faiz na rakh munimon se ai 'kausar'

chaman mein rahte hain ye shaKH-e-be-samar ki tarah