bhala be-KHayali mein kis tarah koi bojh gham ka uTha sakun

bhalā be-ḳhayālī meñ kis tarah koī bojh ġham kā uThā sakūñ

tū kahe to siine meñ jān-e-man tire ġham kā tiir maiñ khā sakūñ

tū hī mere dil ke qarīb hai to 'azīz hai mujhe jaan se

maiñ kahāñ se lā.ūñ vo hausla tujhe haal dil kā sunā sakūñ

tujhe soch soch ke jān-e-jāñ huī muntashir mirī zindagī

na maiñ ro sakūñ na maiñ hañs sakūñ na maiñ aa sakūñ na maiñ jā sakūñ

kahā us ne haath ko chuum kar mire dard-o-ġham kā 'ilāj kar

kahā maiñ to ḳhud huuñ marīz-e-ġham tirā bojh kaise uThā sakūñ

mirā pairahan hai phaTā huā mirā dil hai ġham se aTā huā

yahāñ kaun hai mirā ham-nashīñ jise dard apnā sunā sakūñ

vo 'nadīm' thā jo guzar gayā tire 'ishq meñ yūñhī sargirāñ

dil-e-nā-murād mujhe batā use kaise DhūñD ke lā sakūñ

bhala be-KHayali mein kis tarah koi bojh gham ka uTha sakun

tu kahe to sine mein jaan-e-man tere gham ka tir main kha sakun

tu hi mere dil ke qarib hai to 'aziz hai mujhe jaan se

main kahan se laun wo hausla tujhe haal dil ka suna sakun

tujhe soch soch ke jaan-e-jaan hui muntashir meri zindagi

na main ro sakun na main hans sakun na main aa sakun na main ja sakun

kaha us ne hath ko chum kar mere dard-o-gham ka 'ilaj kar

kaha main to KHud hun mariz-e-gham tera bojh kaise uTha sakun

mera pairahan hai phaTa hua mera dil hai gham se aTa hua

yahan kaun hai mera ham-nashin jise dard apna suna sakun

wo 'nadim' tha jo guzar gaya tere 'ishq mein yunhi sargiran

dil-e-na-murad mujhe bata use kaise DhunD ke la sakun