bhala kahan kise mumkin hai ye ada har bar

bhalā kahāñ kise mumkin hai ye adā har baar

charāġh rakhtā hai lau par dam-e-havā har baar

tū apne hāthoñ kī ThanDak se kar mujhe mānūs

tū merī āñkhoñ pe rakh sho.ala-e-hinā har baar

kabhī to mere lahū ke nishāñ baneñge phuul

maiñ ġham ke dasht se guzrā barahna-pā har baar

ye merī zaat se nisbat huī hai ab kis ko

maiñ ḳhud ko dekhtā huuñ kyuuñ judā judā har baar

kabhī to chamkegā dil raas aa.egī duniyā

jahāñ se guzrā huuñ ye sochtā huā har baar

bachā ke rakkhe salāmat na koī jaañ apnī

sunā.ī detī hai bas ik yahī sadā har baar

vo 'tūr' kyuuñ mirī bātoñ pe ġhussa kartā hai

akhartā kyuuñ hai use merā pūchhnā har baar

bhala kahan kise mumkin hai ye ada har bar

charagh rakhta hai lau par dam-e-hawa har bar

tu apne hathon ki ThanDak se kar mujhe manus

tu meri aankhon pe rakh shoala-e-hina har bar

kabhi to mere lahu ke nishan banenge phul

main gham ke dasht se guzra barahna-pa har bar

ye meri zat se nisbat hui hai ab kis ko

main KHud ko dekhta hun kyun juda juda har bar

kabhi to chamkega dil ras aaegi duniya

jahan se guzra hun ye sochta hua har bar

bacha ke rakkhe salamat na koi jaan apni

sunai deti hai bas ek yahi sada har bar

wo 'tur' kyun meri baaton pe ghussa karta hai

akharta kyun hai use mera puchhna har bar