bhali lagti hai aisi be-baha shai qadr-danon par

bhalī lagtī hai aisī be-bahā shai qadr-dānoñ par

javānī muft meñ barbād hotī hai javānoñ par

falak to bijliyoñ kī tarbiyat kar hī nahīñ paatā

zamīñ-zāde bhī patthar pheñkte haiñ āshiyānoñ par

jahāñ ham haiñ vahāñ honā na honā ḳhush-gumānī hai

ḳhudā kī rahmateñ nāzil hoñ ham se ḳhush-gumānoñ par

dukāneñ phail kar dīvār ban jaatī haiñ raste meñ

lagī rahtī haiñ lekin raunaqeñ kyā kyā dukānoñ par

savā neze pe sūraj aa bhī jaa.e ham na boleñge

qayāmat be-sabab hī TūTtī hai ḳhasta-jānoñ par

zabāñ ko kaaT dete haiñ ki dil kā haal kahtī hai

ye kaisā vaqt nāzuk aa paḌā hai tarjumānoñ par

kuhistānī muhim ho yā masāfat dasht-o-sahrā kī

pahuñch jaate haiñ saare rāste apne Thikānoñ par

utarte hī balā jin meñ ulajh kar be-amāñ hogī

lagā rakkhī haiñ aisī sāñgiyāñ ham ne machānoñ par

ye kyā 'shāhīn' har sūrat mujassam ho ke rah jaa.e

kabhī to aag barse sāl-dīda sard-ḳhānoñ par

bhali lagti hai aisi be-baha shai qadr-danon par

jawani muft mein barbaad hoti hai jawanon par

falak to bijliyon ki tarbiyat kar hi nahin pata

zamin-zade bhi patthar phenkte hain aashiyanon par

jahan hum hain wahan hona na hona KHush-gumani hai

KHuda ki rahmaten nazil hon hum se KHush-gumanon par

dukanen phail kar diwar ban jati hain raste mein

lagi rahti hain lekin raunaqen kya kya dukanon par

sawa neze pe suraj aa bhi jae hum na bolenge

qayamat be-sabab hi TuTti hai KHasta-jaanon par

zaban ko kaT dete hain ki dil ka haal kahti hai

ye kaisa waqt nazuk aa paDa hai tarjumanon par

kuhistani muhim ho ya masafat dasht-o-sahra ki

pahunch jate hain sare raste apne Thikanon par

utarte hi bala jin mein ulajh kar be-aman hogi

laga rakkhi hain aisi sangiyan hum ne machanon par

ye kya 'shahin' har surat mujassam ho ke rah jae

kabhi to aag barse sal-dida sard-KHanon par