bhanwar mein tu hi faqat mera aasra to nahin

bhañvar meñ tū hī faqat merā aasrā to nahīñ

tū nāḳhudā hī sahī par mirā ḳhudā to nahīñ

ik aur mujh ko mirī tarz kā milā hai yahāñ

so ab ye sochtā huuñ maiñ vo dūsrā to nahīñ

abhī bhī chaltā hai saaya jo saath saath mire

batā ai vaqt kabhī maiñ shajar rahā to nahīñ

haiñ gahrī jaḌ se shajar kī bulandiyāñ mashrūt

so pastiyāñ ye kahīñ merā irtiqā to nahīñ

jo paas ye mire be-ḳhauf chale aate haiñ

mire badan pe parindoñ kā ghoñsla to nahīñ

ai aa.ine tū zarā dekh ġhaur se mirī aañkh

gire haiñ ashk koī ḳhvāb bhī girā to nahīñ

bhanwar mein tu hi faqat mera aasra to nahin

tu naKHuda hi sahi par mera KHuda to nahin

ek aur mujh ko meri tarz ka mila hai yahan

so ab ye sochta hun main wo dusra to nahin

abhi bhi chalta hai saya jo sath sath mere

bata ai waqt kabhi main shajar raha to nahin

hain gahri jaD se shajar ki bulandiyan mashrut

so pastiyan ye kahin mera irtiqa to nahin

jo pas ye mere be-KHauf chale aate hain

mere badan pe parindon ka ghonsla to nahin

ai aaine tu zara dekh ghaur se meri aankh

gire hain ashk koi KHwab bhi gira to nahin