bhar gai firqa-paraston se ye duniya kaise

bhar ga.ī firqa-parastoñ se ye duniyā kaise

raam rahmān meñ hone lagā jhagḌā kaise

hiir par kuchh nahīñ teshe pe savāl uTThegā

ishq meñ mar gayā rāñjhā koī pyāsā kaise

mere bhaa.ī ne jalā Daalā hai ab ke mujh ko

chāh-e-kan.āñ se mirā niklegā kapḌā kaise

ḳhud se ik umr lagī rishta banāne meñ mujhe

log an-jānoñ se kar lete haiñ rishta kaise

ham ne kashtī ko samundar meñ utārā hī nahīñ

ham ko tūfāñ meñ nazar aa.e jazīra kaise

zimme-dārī kā koī bojh uThāyā bhī nahīñ

vaqt se pahle hī hone lagā būḌhā kaise

umr-bhar maiñ ne gulāboñ kī tijārat kī hai

paḌ gayā hai ye mire haath meñ chhālā kaise

ik payambar kī taraf-dār hai maanā bastī

but yahāñ biktā hai aazar kā tarāshā kaise

har qadam par ye sañbhāle hai anā ko merī

phaaḌ kar pheñk duuñ ġhurbat kā labāda kaise

zahr-e-ġham ham ne zamāne kā piyā hai barsoñ

tan-badan aap kā hone lagā niilā kaise

bhar gai firqa-paraston se ye duniya kaise

ram rahman mein hone laga jhagDa kaise

hir par kuchh nahin teshe pe sawal uTThega

ishq mein mar gaya ranjha koi pyasa kaise

mere bhai ne jala Dala hai ab ke mujh ko

chah-e-kanan se mera niklega kapDa kaise

KHud se ek umr lagi rishta banane mein mujhe

log an-jaanon se kar lete hain rishta kaise

hum ne kashti ko samundar mein utara hi nahin

hum ko tufan mein nazar aae jazira kaise

zimme-dari ka koi bojh uThaya bhi nahin

waqt se pahle hi hone laga buDha kaise

umr-bhar main ne gulabon ki tijarat ki hai

paD gaya hai ye mere hath mein chhaala kaise

ek payambar ki taraf-dar hai mana basti

but yahan bikta hai aazar ka tarasha kaise

har qadam par ye sanbhaale hai ana ko meri

phaD kar phenk dun ghurbat ka labaada kaise

zahr-e-gham hum ne zamane ka piya hai barson

tan-badan aap ka hone laga nila kaise