bhar ke daman mein tera ranj teri yaad samet

bhar ke dāman meñ tirā ranj tirī yaad samet

lauT jā.eñge isī girya-e-bedād samet

jaise ham kār-e-jahāñ ke liye mauzūñ hī na hoñ

ham ko lauTā diyā jaatā rahā asnād samet

log chaupāl meñ baiThe the magar sākit the

ham bhī ḳhāmosh rahe zaḳhm kī rūdād samet

jotshī koī ulaT-pher kā hal hai ki nahīñ

sab sitāre haiñ nahūsat bhare ā'dād samet

maiñ ne hī bhuuk ko ḳhairāt pe bartar rakkhā

log aa.e the mirī samt bhī imdād samet

maiñ to jo dekh rahī huuñ vahī bolūñgī sadā

qaid kar dījiye mujh ko lab-e-āzād samet

maiñ ne kis jabr meñ kaaTī hai ye pasmāñda hayāt

mujh ko koī bhī na samjhā mirī aulād samet

bhar ke daman mein tera ranj teri yaad samet

lauT jaenge isi girya-e-bedad samet

jaise hum kar-e-jahan ke liye mauzun hi na hon

hum ko lauTa diya jata raha asnad samet

log chaupal mein baiThe the magar sakit the

hum bhi KHamosh rahe zaKHm ki rudad samet

jotshi koi ulaT-pher ka hal hai ki nahin

sab sitare hain nahusat bhare aa'dad samet

main ne hi bhuk ko KHairaat pe bartar rakkha

log aae the meri samt bhi imdad samet

main to jo dekh rahi hun wahi bolungi sada

qaid kar dijiye mujh ko lab-e-azad samet

main ne kis jabr mein kaTi hai ye pasmanda hayat

mujh ko koi bhi na samjha meri aulad samet