bharam khulne na pae bandagi ka

bharam khulne na paa.e bandagī kā

vo mātam kar rahe haiñ zindagī kā

ta.ajjub hai ḳhulūs-e-dostāñ par

nahīñ ġham dushmanoñ kī dushmanī kā

bhaḌak uThtī hai dil meñ ātish-e-ġham

ḳhayāl aatā hai jab un kī galī kā

abhī hai band aañkh insāniyat kī

abhī dam ghuT rahā hai aadmī kā

tumhārī yaad ne kī rahnumā.ī

ḳhayāl aayā mujhe jab be-ḳhudī kā

lagī dil kī ho alfāz-o-bayāñ meñ

yahī ek ḳhaas fan hai shā.irī kā

vahī dushman bane baiThe haiñ 'maikash'

jo dam bharte the apnī dostī kā

bharam khulne na pae bandagi ka

wo matam kar rahe hain zindagi ka

tajjub hai KHulus-e-dostan par

nahin gham dushmanon ki dushmani ka

bhaDak uThti hai dil mein aatish-e-gham

KHayal aata hai jab un ki gali ka

abhi hai band aankh insaniyat ki

abhi dam ghuT raha hai aadmi ka

tumhaari yaad ne ki rahnumai

KHayal aaya mujhe jab be-KHudi ka

lagi dil ki ho alfaz-o-bayan mein

yahi ek KHas fan hai shairi ka

wahi dushman bane baiThe hain 'maikash'

jo dam bharte the apni dosti ka