bhare hain aankhon mein aansu main ro nahin sakti

bhare haiñ āñkhoñ meñ aañsū maiñ ro nahīñ saktī

ki āñsuoñ se koī zaḳhm dho nahīñ saktī

maiñ jiite jī nahīñ chhoḌūñgī haath se dāman

tujh aisā gauhar-e-nāyāb kho nahīñ saktī

qadam qadam pe vo patthar bichhā rahā hai to kyā

maiñ us kī raah meñ kāñTe to bo nahīñ saktī

taqāzā kyā hai masīhā.ī kā samajhtī huuñ

kisī ke dil meñ bhī nashtar chubho nahīñ saktī

kinārā duur sahī nāḳhudā hai merā ḳhudā

koī bhī mauj safīna Dubo nahīñ saktī

tū āshnā nahīñ tahzīb-e-ishq se shāyad

maiñ apnā 'ahd-e-vafā toḌ to nahīñ saktī

nigāh dar pe lagī rahtī hai mirī 'zohra'

ghar aa na jaa.eñ vo jab tak maiñ so nahīñ saktī

bhare hain aankhon mein aansu main ro nahin sakti

ki aansuon se koi zaKHm dho nahin sakti

main jite ji nahin chhoDungi hath se daman

tujh aisa gauhar-e-nayab kho nahin sakti

qadam qadam pe wo patthar bichha raha hai to kya

main us ki rah mein kanTe to bo nahin sakti

taqaza kya hai masihai ka samajhti hun

kisi ke dil mein bhi nashtar chubho nahin sakti

kinara dur sahi naKHuda hai mera KHuda

koi bhi mauj safina Dubo nahin sakti

tu aashna nahin tahzib-e-ishq se shayad

main apna 'ahd-e-wafa toD to nahin sakti

nigah dar pe lagi rahti hai meri 'zohra'

ghar aa na jaen wo jab tak main so nahin sakti