bhare jahan mein koi raazdar bhi na mila

bhare jahāñ meñ koī rāzdār bhī na milā

qarār DhūñDne nikle qarār bhī na milā

ye merī soḳhta-baḳhtī nahīñ to phir kyā hai

vo phuul laa.e to merā mazār bhī na milā

na jaane kaisī karāmat thī dast-e-sāqī meñ

ba-qaid-e-hosh koī hoshiyār bhī na milā

chaman chaman meñ udāsī kā bol-bālā hai

bahār kaisī nishān-e-bahār bhī na milā

bahut the aish ke lamhoñ meñ jāñ-nisār apne

paḌā jo vaqt koī ġham-gusār bhī na milā

maiñ apne gaañv meñ rah kar bhī ajnabī hī rahā

mujhe to apnoñ se thoḌā sā pyaar bhī na milā

ḳharāb hī rahī qismat ḳhizāñ-nasīboñ kī

bahār aa.ī to lutf-e-bahār bhī na milā

hañsī to apnā muqaddar na thī magar 'kausar'

hameñ to rone pe kuchh iḳhtiyār bhī na milā

bhare jahan mein koi raazdar bhi na mila

qarar DhunDne nikle qarar bhi na mila

ye meri soKHta-baKHti nahin to phir kya hai

wo phul lae to mera mazar bhi na mila

na jaane kaisi karamat thi dast-e-saqi mein

ba-qaid-e-hosh koi hoshiyar bhi na mila

chaman chaman mein udasi ka bol-baala hai

bahaar kaisi nishan-e-bahaar bhi na mila

bahut the aish ke lamhon mein jaan-nisar apne

paDa jo waqt koi gham-gusar bhi na mila

main apne ganw mein rah kar bhi ajnabi hi raha

mujhe to apnon se thoDa sa pyar bhi na mila

KHarab hi rahi qismat KHizan-nasibon ki

bahaar aai to lutf-e-bahaar bhi na mila

hansi to apna muqaddar na thi magar 'kausar'

hamein to rone pe kuchh iKHtiyar bhi na mila