bhare kamre mein udasi ka asar tanha kiya

bhare kamre meñ udāsī kā asar tanhā kiyā

jaane kyā baat thī kyā soch ke ghar tanhā kiyā

ḳhud meñ jhāñkā to mire jism se marbūt thā vo

maiñ ne jis jis ko bhī tā-hadd-e-nazar tanhā kiyā

kis ikaa.ī ko bikharne duuñ kise jam.a karūñ

kahāñ karnā thā badan tanhā kidhar tanhā kiyā

mere malbe kī bachat roz khaTaktī thī use

mere vahshī ne mujhe bār-e-digar tanhā kiyā

kitnī mushkil se basāyā tirā dhaḌkā dil meñ

jism ābād na ho jaa.e agar tanhā kiyā

mujh ḳhalā-zād meñ vo ḳhālī jagah chāhtī thī

karnā bantā to na thā ḳhud ko magar tanhā kiyā

ik nishast us ke liye ḳhālī rakhī vahshat kī

jis ke hamrāh mohabbat kā safar tanhā kiyā

bhare kamre mein udasi ka asar tanha kiya

jaane kya baat thi kya soch ke ghar tanha kiya

KHud mein jhanka to mere jism se marbut tha wo

main ne jis jis ko bhi ta-hadd-e-nazar tanha kiya

kis ikai ko bikharne dun kise jama karun

kahan karna tha badan tanha kidhar tanha kiya

mere malbe ki bachat roz khaTakti thi use

mere wahshi ne mujhe bar-e-digar tanha kiya

kitni mushkil se basaya tera dhaDka dil mein

jism aabaad na ho jae agar tanha kiya

mujh KHala-zad mein wo KHali jagah chahti thi

karna banta to na tha KHud ko magar tanha kiya

ek nishast us ke liye KHali rakhi wahshat ki

jis ke hamrah mohabbat ka safar tanha kiya