bhare makan mein rote hue akela tha

bhare makān meñ rote hue akelā thā

maiñ apne logoñ ke hote hue akelā thā

maiñ us ke baa'd kabhī niiñd meñ na jā paayā

vo mere ḳhvāb meñ sote hue akelā thā

vagarna aaj tirā naam jaan lete sab

maiñ apne zaḳhm ko dhote hue akelā thā

ab us kī chhāñv meñ bachche galī ke khelte haiñ

maiñ jis daraḳht ko bote hue akelā thā

ye sab parinde use dekhne ko aa.e haiñ

ye ik shajar ki jo rote hue akelā thā

ye aaj sonā banī hai to yaar aa pahuñche

maiñ apnī miTTī ko Dhote hue akelā thā

vo tā'ziyat ke liye dostoñ ke saath aayā

jo shaḳhs mujh ko Dubote hue akelā thā

bhare makan mein rote hue akela tha

main apne logon ke hote hue akela tha

main us ke ba'd kabhi nind mein na ja paya

wo mere KHwab mein sote hue akela tha

wagarna aaj tera nam jaan lete sab

main apne zaKHm ko dhote hue akela tha

ab us ki chhanw mein bachche gali ke khelte hain

main jis daraKHt ko bote hue akela tha

ye sab parinde use dekhne ko aae hain

ye ek shajar ki jo rote hue akela tha

ye aaj sona bani hai to yar aa pahunche

main apni miTTi ko Dhote hue akela tha

wo ta'ziyat ke liye doston ke sath aaya

jo shaKHs mujh ko Dubote hue akela tha