bhare paDe hain meri aankh mein azab ke zaKHm

bhare paḌe haiñ mirī aañkh meñ azaab ke zaḳhm

kahīñ pe niiñd kī choTeñ kahīñ pe ḳhvāb ke zaḳhm

'ajīb dasht thā jis meñ saje the ḳhvāb ke zaḳhm

khulī jo aañkh to dil par mile azaab ke zaḳhm

dikhe haiñ tum ko jo dast-e-varaq pe kaale nishāñ

unhīñ ko kahtī hai hassāsiyyat kitāb ke zaḳhm

bujhī sī dhuup kī āñkheñ Dhalā huā chehra

yahī to saaf batāte haiñ āftāb ke zaḳhm

ye kaun aayā gayā hai yahāñ shab-e-me’rāj

miTā gayā jo kaf-e-pā se māhtāb ke zaḳhm

bahut se pyāse sar-e-nahr aa ke lauT ga.e

kisī bhī shaḳhs ne dekhe nahīñ hubāb ke zaḳhm

lipaT ke kartī hai shabnam ‘ilāj-e-zaḳhm yahāñ

magar mahakte haiñ har din kisī gulāb ke zaḳhm

bichhā hai āñkhoñ meñ 'shārib' ke niiñd kā bistar

qiyām karte haiñ aa kar yahāñ pe ḳhvāb ke zaḳhm

bhare paDe hain meri aankh mein azab ke zaKHm

kahin pe nind ki choTen kahin pe KHwab ke zaKHm

'ajib dasht tha jis mein saje the KHwab ke zaKHm

khuli jo aankh to dil par mile azab ke zaKHm

dikhe hain tum ko jo dast-e-waraq pe kale nishan

unhin ko kahti hai hassasiyyat kitab ke zaKHm

bujhi si dhup ki aankhen Dhala hua chehra

yahi to saf batate hain aaftab ke zaKHm

ye kaun aaya gaya hai yahan shab-e-me’raj

miTa gaya jo kaf-e-pa se mahtab ke zaKHm

bahut se pyase sar-e-nahr aa ke lauT gae

kisi bhi shaKHs ne dekhe nahin hubab ke zaKHm

lipaT ke karti hai shabnam ‘ilaj-e-zaKHm yahan

magar mahakte hain har din kisi gulab ke zaKHm

bichha hai aankhon mein 'shaarib' ke nind ka bistar

qiyam karte hain aa kar yahan pe KHwab ke zaKHm