bhare-pure se makan mein bhi shah tanha hai

bhare-pure se makāñ meñ bhī 'shāh' tanhā hai

ridā-e-shab ke kināre pe ek taarā hai

bas ek lamha thā haa.il tujhe bhulāne meñ

ye kis maqām pe terā ḳhayāl aayā hai

tamām gard hai chehra thakī thakī āñkheñ

udāsiyoñ kā ye bādal bahut ghanerā hai

shab-e-siyah meñ hai terī hī yaad kā lapkā

nigāh Thokareñ khātī hai ghup añdherā hai

nazar kī raah meñ be-manzarī sī phailā kar

vo ik sitāra sar-e-shām Duub jaatā hai

vo ek lamha-e-be-iḳhtiyār jab maiñ ne

tujhe chhuā thā mirī uñgliyoñ meñ jaltā hai

us ek vahm ne zinda rakhā kabhī merī

nazar kā lams tujhe gudgudāne vaalā hai

ḳhudā ko sauñp ke ruḳhsat huā thā tū mujh se

mujhe ḳhudā hī ne ab tak sambhāl rakkhā hai

tū aaj sāmne aa.e to kaise pahchānūñ

mirī nazar meñ to ab tak vahī sarāpā hai

bhare-pure se makan mein bhi 'shah' tanha hai

rida-e-shab ke kinare pe ek tara hai

bas ek lamha tha hail tujhe bhulane mein

ye kis maqam pe tera KHayal aaya hai

tamam gard hai chehra thaki thaki aankhen

udasiyon ka ye baadal bahut ghanera hai

shab-e-siyah mein hai teri hi yaad ka lapka

nigah Thokaren khati hai ghup andhera hai

nazar ki rah mein be-manzari si phaila kar

wo ek sitara sar-e-sham Dub jata hai

wo ek lamha-e-be-iKHtiyar jab main ne

tujhe chhua tha meri ungliyon mein jalta hai

us ek wahm ne zinda rakha kabhi meri

nazar ka lams tujhe gudgudane wala hai

KHuda ko saunp ke ruKHsat hua tha tu mujh se

mujhe KHuda hi ne ab tak sambhaal rakkha hai

tu aaj samne aae to kaise pahchanun

meri nazar mein to ab tak wahi sarapa hai