bhari hai aag jebon mein kaf-e-afsos malte hain

bharī hai aag jeboñ meñ kaf-e-afsos malte haiñ

hamārī hī kamā.ī se hamāre haath jalte haiñ

mire atrāf meñ ye khīñchā-tānī kam nahīñ hotī

idhar pahlū badaltā huuñ udhar jaale badalte haiñ

kisī ko bhī vo añgāra dikhā.ī hī nahīñ detā

ishāre se batātā huuñ to apne haath jalte haiñ

maiñ apne jism se bāhar huuñ yā rūhoñ kā maskan hai

unheñ maiñ chhū nahīñ paatā jo mere saath chalte haiñ

hamāre chaak par uqbā ka.ī shakleñ badaltī hai

ye jannat aur jahannum to hamāre saath chalte haiñ

nazar-andāz karke sab guzar jaate haiñ mujh meñ se

nafī karte hue mujh meñ ka.ī raste nikalte haiñ

sadā ban kar bahut Takrā.e haiñ mīnār-o-gumbad se

ab āñkheñ khul ga.ī haiñ to añdhere se nikalte haiñ

bhari hai aag jebon mein kaf-e-afsos malte hain

hamari hi kamai se hamare hath jalte hain

mere atraf mein ye khincha-tani kam nahin hoti

idhar pahlu badalta hun udhar jale badalte hain

kisi ko bhi wo angara dikhai hi nahin deta

ishaare se batata hun to apne hath jalte hain

main apne jism se bahar hun ya ruhon ka maskan hai

unhen main chhu nahin pata jo mere sath chalte hain

hamare chaak par uqba kai shaklen badalti hai

ye jannat aur jahannum to hamare sath chalte hain

nazar-andaz karke sab guzar jate hain mujh mein se

nafi karte hue mujh mein kai raste nikalte hain

sada ban kar bahut Takrae hain minar-o-gumbad se

ab aankhen khul gai hain to andhere se nikalte hain