bhari mahfil mein tanhai ka aalam DhunD leta hai

bharī mahfil meñ tanhā.ī kā aalam DhūñD letā hai

jo aa.e raas dil aksar vo mausam DhūñD letā hai

kisī lamhe akelā-pan agar mahsūs ho dil ko

ḳhayāl-e-yār ke dāman se kuchh ġham DhūñD letā hai

kisī rut se rahe mashrūt kab haiñ roz-o-shab mere

jahāñ jaisā ye chāhe dil vo mausam DhūñD letā hai

ġham-e-furqat kā dil ko bojh karnā ho agar halkā

sunāne ko tire qisse ye hamdam DhūñD letā hai

judā.ī kab rahī mumkin kisī hālat koī sūrat

mujhe mahfil ho tanhā.ī tirā ġham DhūñD letā hai

rahe yuuñ naaz apne zehn par lāhaq ġhamoñ meñ bhī

ḳhushī kā ik na ik pahlū ye tāham DhūñD letā hai

ḳhayāl-e-yār hī darmāñ ġham-e-furqat ke zaḳhmoñ kā

ki biite saath lamhoñ se ye marham DhūñD letā hai

bhari mahfil mein tanhai ka aalam DhunD leta hai

jo aae ras dil aksar wo mausam DhunD leta hai

kisi lamhe akela-pan agar mahsus ho dil ko

KHayal-e-yar ke daman se kuchh gham DhunD leta hai

kisi rut se rahe mashrut kab hain roz-o-shab mere

jahan jaisa ye chahe dil wo mausam DhunD leta hai

gham-e-furqat ka dil ko bojh karna ho agar halka

sunane ko tere qisse ye hamdam DhunD leta hai

judai kab rahi mumkin kisi haalat koi surat

mujhe mahfil ho tanhai tera gham DhunD leta hai

rahe yun naz apne zehn par lahaq ghamon mein bhi

KHushi ka ek na ek pahlu ye taham DhunD leta hai

KHayal-e-yar hi darman gham-e-furqat ke zaKHmon ka

ki bite sath lamhon se ye marham DhunD leta hai