bharne ko jo daman koi phulon se chala ho

bharne ko jo dāman koī phūloñ se chalā ho

kyā jāniye us shaḳhs kā kyā haal huā ho

TuuTe hue kuchh ḳhvāb the paivasta-e-taqdīr

kirdār meñ un kā koī reza na chubhā ho

aisā bhī huā hai kabhī is dahr meñ lā kar

insān kī qismat ko ḳhudā bhuul gayā ho

jis aañkh ne is haal ko pahuñchāyā ho kyā ḳhuub

ye haal usī aañkh se dekhā na gayā ho

kis tarah phir āmādgī-e-qalb se maliye

dukhte hue ehsās kā jab zaḳhm harā ho

be-rabtī-e-anfās ke daurān tirī yaad

yuuñ jaise masīhā koī raste meñ milā ho

ik baar 'nasīm' aisī koī kījiye ḳhvāhish

jo shauq ke nā-karda gunāhoñ kī sazā ho

bharne ko jo daman koi phulon se chala ho

kya jaaniye us shaKHs ka kya haal hua ho

TuTe hue kuchh KHwab the paiwasta-e-taqdir

kirdar mein un ka koi reza na chubha ho

aisa bhi hua hai kabhi is dahr mein la kar

insan ki qismat ko KHuda bhul gaya ho

jis aankh ne is haal ko pahunchaya ho kya KHub

ye haal usi aankh se dekha na gaya ho

kis tarah phir aamadgi-e-qalb se maliye

dukhte hue ehsas ka jab zaKHm hara ho

be-rabti-e-anfas ke dauran teri yaad

yun jaise masiha koi raste mein mila ho

ek bar 'nasim' aisi koi kijiye KHwahish

jo shauq ke na-karda gunahon ki saza ho