bharosa phulon ka kanTon ka eatibar nahin

bharosa phūloñ kā kāñToñ kā e.atibār nahīñ

ta.ayyunāt ke ḳhāke haiñ ye bahār nahīñ

maiñ kaise aap ke va.ade kā e.atibār karūñ

huzūr jab mujhe ḳhud apnā e.atibār nahīñ

mire shu.ūr-e-mohabbat kī jis se zillat ho

ḳhudā ke fazl se aisā mirā shi.ār nahīñ

vo but-kada ho ki ka.aba ho yā ki mai-ḳhāna

kisī jagah bhī mohabbat se mujh ko aar nahīñ

uThānī paḌtī hai zillat qadam qadam pe use

jahāñ meñ jis kā sadāqat agar shi.ār nahīñ

vo phuul ḳhaar hai jo gir gayā nazar se tirī

vo ḳhaar gul hai jo nazroñ meñ terī ḳhaar nahīñ

kisī kī saaqī ke qadmoñ pe hai jabīn-e-niyāz

kisī ko saaqī pe ḳhud apne e.atibār nahīñ

tū apnī āñkhoñ se saaqī pilā ke be-ḳhud kar

piyūñ maiñ jaam se aisā to bāda-ḳhvār nahīñ

gunāhgāroñ pe hai jab ki rahmatoñ kā nuzūl

kahūñ maiñ kaise phir 'akmal' gunāhgār nahīñ

bharosa phulon ka kanTon ka eatibar nahin

tayyunat ke KHake hain ye bahaar nahin

main kaise aap ke wade ka eatibar karun

huzur jab mujhe KHud apna eatibar nahin

mere shuur-e-mohabbat ki jis se zillat ho

KHuda ke fazl se aisa mera shiar nahin

wo but-kada ho ki kaba ho ya ki mai-KHana

kisi jagah bhi mohabbat se mujh ko aar nahin

uThani paDti hai zillat qadam qadam pe use

jahan mein jis ka sadaqat agar shiar nahin

wo phul KHar hai jo gir gaya nazar se teri

wo KHar gul hai jo nazron mein teri KHar nahin

kisi ki saqi ke qadmon pe hai jabin-e-niyaz

kisi ko saqi pe KHud apne eatibar nahin

tu apni aankhon se saqi pila ke be-KHud kar

piyun main jam se aisa to baada-KHwar nahin

gunahgaron pe hai jab ki rahmaton ka nuzul

kahun main kaise phir 'akmal' gunahgar nahin