bharte hi chhalak jaana paimana-mizaji hai

bharte hī chhalak jaanā paimāna-mizājī hai

sāmān-e-musībat ye tiflāna-mizājī hai

ham haiñ ki dhaḌakte haiñ dil ban ke charāġhoñ kā

kyā aap ne samjhā hai parvāna-mizājī hai

ye qāfile sheroñ ke ye anjuman-ārā.ī

ġham-ḳhāna-e-hastī meñ dīvāna-mizājī hai

kyuuñ aaj ye mahfil meñ ḳhāmoshiyāñ bikhrī haiñ

gum-sum haiñ ka.ī chehre begāna-mizājī hai

bastā hī nahīñ koī sab jaane ko baiThe haiñ

is ghar hī kī qismat meñ vīrāna-mizājī hai

badlegā ye mausam bhī ye daur bhī guzregā

dekheñge yahāñ kab tak shāhāna-mizājī hai

ham ḳhaak hue aise miTtā hī nahīñ koī

lekin vahī saudā hai dīvāna-mizājī hai

'mumtāz' chalo ik din tāroñ se kareñ bāteñ

insānoñ kī fitrat meñ afsāna-mizājī hai

bharte hi chhalak jaana paimana-mizaji hai

saman-e-musibat ye tiflana-mizaji hai

hum hain ki dhaDakte hain dil ban ke charaghon ka

kya aap ne samjha hai parwana-mizaji hai

ye qafile sheron ke ye anjuman-arai

gham-KHana-e-hasti mein diwana-mizaji hai

kyun aaj ye mahfil mein KHamoshiyan bikhri hain

gum-sum hain kai chehre begana-mizaji hai

basta hi nahin koi sab jaane ko baiThe hain

is ghar hi ki qismat mein virana-mizaji hai

badlega ye mausam bhi ye daur bhi guzrega

dekhenge yahan kab tak shahana-mizaji hai

hum KHak hue aise miTta hi nahin koi

lekin wahi sauda hai diwana-mizaji hai

'mumtaz' chalo ek din taron se karen baaten

insanon ki fitrat mein afsana-mizaji hai