bheja hua hai aur na bulaya hua hai dard

bhejā huā hai aur na bulāyā huā hai dard

mehmān ban ke dil meñ samāyā huā hai dard

āñkhoñ se ik jhaḌī hai musalsal lagī huī

lagtā hai āshiqī kā satāyā huā hai dard

ham haiñ jazā-e-tīra-shabī meñ guñdhe hue

apnī razā se dil se lagāyā huā hai dard

jaise milā.e rind-e-ḳharābāt mai se mai

ham ne bhī shām-e-ġham meñ milāyā huā hai dard

jis ishtihā-e-ishq ko sadiyāñ guzar ga.iiñ

mushkil se is maqām pe laayā huā hai dard

din kārhā-e-mashq-e-zamāna meñ kaaT kar

shab kī riyāzatoñ se kamāyā huā hai dard

pahle pahal to dard varā-e-gumān thā

aur ab surūr-e-zabt kā bhāyā huā hai dard

ik fard-e-nā-shanās kī chāhat meñ 'ābdī'

muddat huī ki dil ne bhulāyā huā hai dard

bheja hua hai aur na bulaya hua hai dard

mehman ban ke dil mein samaya hua hai dard

aankhon se ek jhaDi hai musalsal lagi hui

lagta hai aashiqi ka sataya hua hai dard

hum hain jaza-e-tira-shabi mein gundhe hue

apni raza se dil se lagaya hua hai dard

jaise milae rind-e-KHarabaat mai se mai

hum ne bhi sham-e-gham mein milaya hua hai dard

jis ishtiha-e-ishq ko sadiyan guzar gain

mushkil se is maqam pe laya hua hai dard

din karha-e-mashq-e-zamana mein kaT kar

shab ki riyazaton se kamaya hua hai dard

pahle pahal to dard wara-e-guman tha

aur ab surur-e-zabt ka bhaya hua hai dard

ek fard-e-na-shanas ki chahat mein 'abdi'

muddat hui ki dil ne bhulaya hua hai dard