bhes kya kya na zamane mein banae humne

bhes kyā kyā na zamāne meñ banā.e ham ne

ek chehre pe ka.ī chehre lagā.e ham ne

is tamannā meñ ki is raah se tū guzregā

diip har raah meñ har raat jalā.e ham ne

dil se niklī na ḳharāsh-e-ġham-e-ayyām kī dhuup

tere nāḳhun se ka.ī chāñd banā.e ham ne

dāman-e-yār ne haq apnā jatāyā na kabhī

ashk umDe bhī to palkoñ meñ chhupā.e ham ne

ḳhud hue ġharq zamāne ko bhī ġharqāb kiyā

ek aañsū se vo tūfān uThā.e ham ne

tere pahlū se bhī pahuñche na tire pahlū tak

fāsle qurb ke go laakh ghaTā.e ham ne

chehre katbe sahī katboñ kī ibārat pe na jā

abhī lafzoñ se kahāñ parde uThā.e ham ne

sher kahne se na mahbūb na duniyā hī milī

umr-bhar sher kahe sher sunā.e ham ne

bhes kya kya na zamane mein banae hum ne

ek chehre pe kai chehre lagae hum ne

is tamanna mein ki is rah se tu guzrega

dip har rah mein har raat jalae hum ne

dil se nikli na KHarash-e-gham-e-ayyam ki dhup

tere naKHun se kai chand banae hum ne

daman-e-yar ne haq apna jataya na kabhi

ashk umDe bhi to palkon mein chhupae hum ne

KHud hue gharq zamane ko bhi gharqab kiya

ek aansu se wo tufan uThae hum ne

tere pahlu se bhi pahunche na tere pahlu tak

fasle qurb ke go lakh ghaTae hum ne

chehre katbe sahi katbon ki ibarat pe na ja

abhi lafzon se kahan parde uThae hum ne

sher kahne se na mahbub na duniya hi mili

umr-bhar sher kahe sher sunae hum ne