bhige honTon ka tasawwur liye sukhe hue honT

bhīge hoñToñ kā tasavvur liye sūkhe hue hoñT

hijr meñ ham liye baiThe rahe tarse hue hoñT

bevafā.ī laboñ kā svaad badal detī hai

ham na chūmeñge kisī aur ke chūme hue hoñT

ruuh tak zā.iqe tabdīl kiye haiñ us ne

is pe kyā chauñkeñ use chuum ke mīThe hue hoñT

kis qadar pyaas kā taḌpāyā huā hogā vo

kitne sūkhe haiñ musavvir ke banā.e hue hoñT

chuum kar us ne hathelī se uḌāyā bosa

maiñ ne āñkhoñ pe raqam kar liye uḌte hue hoñT

ye batāte haiñ samundar zamīñ kā pyāsā hai

ye kināroñ kī taraf lahr ke aate hue hoñT

raat us mo.ajize kā sab se hasīñ chehra hai

chāñd hai raat ke chehre pe sajā.e hue hoñT

bhige honTon ka tasawwur liye sukhe hue honT

hijr mein hum liye baiThe rahe tarse hue honT

bewafai labon ka swad badal deti hai

hum na chumenge kisi aur ke chume hue honT

ruh tak zaiqe tabdil kiye hain us ne

is pe kya chaunken use chum ke miThe hue honT

kis qadar pyas ka taDpaya hua hoga wo

kitne sukhe hain musawwir ke banae hue honT

chum kar us ne hatheli se uDaya bosa

main ne aankhon pe raqam kar liye uDte hue honT

ye batate hain samundar zamin ka pyasa hai

ye kinaron ki taraf lahr ke aate hue honT

raat us moajize ka sab se hasin chehra hai

chand hai raat ke chehre pe sajae hue honT