bhula dena na ahl-e-dil ko tum jashn-e-bahaaran mein

bhulā denā na ahl-e-dil ko tum jashn-e-bahārāñ meñ

ki un kā ḳhuun bhī shāmil hai ta.amīr-e-gulistāñ meñ

abhī to shahr se laa.e the un ko iltijā karke

pahuñch jaa.eñ na dīvāne kahīñ phir se bayābāñ meñ

huī jaatī hai kyoñ mādūm ra.anā.ī bahāroñ kī

banā.ī hai ḳhizāñ ne rahguzar shahr-e-nigārāñ meñ

mahal ḳhvāboñ ke girte jā rahe haiñ yūrish-e-ġham se

mohabbat kī kamī mahsūs hotī hai dil-o-jāñ meñ

zarā sā farq jab shahr-o-bayābāñ meñ nahīñ baaqī

to phir ye ajnabiyyat sī hai kyoñ dast-o-garebāñ meñ

dil-e-kaj-fahm kab samjhegā hālāt-e-zabūñ āḳhir

sukūñ kī raushnī miltī nahīñ zehn-e-pareshāñ meñ

'sirāj' us ko nahīñ barbādī-e-gulshan kā ġham koī

koī tabdīlī shāyad ho ga.ī chashm-e-nigahbāñ meñ

bhula dena na ahl-e-dil ko tum jashn-e-bahaaran mein

ki un ka KHun bhi shamil hai tamir-e-gulistan mein

abhi to shahr se lae the un ko iltija karke

pahunch jaen na diwane kahin phir se bayaban mein

hui jati hai kyon madum ranai bahaaron ki

banai hai KHizan ne rahguzar shahr-e-nigaran mein

mahal KHwabon ke girte ja rahe hain yurish-e-gham se

mohabbat ki kami mahsus hoti hai dil-o-jaan mein

zara sa farq jab shahr-o-bayaban mein nahin baqi

to phir ye ajnabiyyat si hai kyon dast-o-gareban mein

dil-e-kaj-fahm kab samjhega haalat-e-zabun aaKHir

sukun ki raushni milti nahin zehn-e-pareshan mein

'siraj' us ko nahin barbaadi-e-gulshan ka gham koi

koi tabdili shayad ho gai chashm-e-nigahban mein