bhul paya na wo aankhen na wo chehra ta-umr

bhuul paayā na vo āñkheñ na vo chehra tā-umr

kaisā manzar thā mirī aañkh meñ khaTkā tā-umr

zindagī tujh se mirā ishq bhī āsān na thā

paar kartā rahā maiñ aag kā dariyā tā-umr

raat kī raanī mahaktī rahī ghar ke andar

aur bāhar rahā ḳhurshīd kā pahra tā-umr

bhuul jaane kā amal bhī koī āsān na thā

ashk ban-ban ke lahū aañkh se Tapkā tā-umr

maiñ tahī-dast rahā apnī hī vahshat kā shikār

aur kartī rahī duniyā mirā pīchhā tā-umr

apne qadmoñ se kabhī us ko nikalne na diyā

mujh se bad-zan rahā ḳhud merā hī saayā tā-umr

saarī ḳhushbū to mire ghar ke dar-o-bām meñ thī

maiñ 'ziyā' kis ke liye dasht meñ bhaTkā tā-umr

bhul paya na wo aankhen na wo chehra ta-umr

kaisa manzar tha meri aankh mein khaTka ta-umr

zindagi tujh se mera ishq bhi aasan na tha

par karta raha main aag ka dariya ta-umr

raat ki rani mahakti rahi ghar ke andar

aur bahar raha KHurshid ka pahra ta-umr

bhul jaane ka amal bhi koi aasan na tha

ashk ban-ban ke lahu aankh se Tapka ta-umr

main tahi-dast raha apni hi wahshat ka shikar

aur karti rahi duniya mera pichha ta-umr

apne qadmon se kabhi us ko nikalne na diya

mujh se bad-zan raha KHud mera hi saya ta-umr

sari KHushbu to mere ghar ke dar-o-baam mein thi

main 'ziya' kis ke liye dasht mein bhaTka ta-umr