bhula hai baad-e-marg mujhe dost yan talak

bhūlā hai ba.ad-e-marg mujhe dost yaañ talak

sag bhī na us kā aayā mirī ustuḳhāñ talak

go ham qafas se jā na sake bostāñ talak

uḌ uḌ ke rañg-e-chehra gayā par vahāñ talak

bulbul hujūm-e-gul hai chaman meñ yahāñ talak

phūloñ se chhā gayā hai tirā āshiyāñ talak

kab pahuñchī aah zo.af se gosh-e-butāñ talak

sau jā Thahar ke siine se aa.ī zabāñ talak

parvāz pesh aziiñ thī mirī āsmāñ talak

ab to chaman se jā na sakūñ āshiyāñ talak

aisā kiyā za.iif ġham-e-intizār ne

āñkhoñ ko merī baar hai ḳhvāb-e-girāñ talak

aalim huuñ ilm-e-ishq kā maiñ kar na ham-sarī

ai andalīb tū hai paḌī bostāñ talak

us mah ke vasf se ye huā martaba buland

pahuñchī mirī ġhazal kī zamīñ āsmāñ talak

pās-e-adab rahā hai junūñ meñ bhī is qadar

aatā huuñ sajde kartā tire āstāñ talak

us mast ke haiñ gesūoñ ke silsile meñ ham

saaqī murīd jis kā hai pīr-e-muġhāñ talak

rakkheñ adab se paañv na ham terī raah meñ

bāhar jab aap se hoñ to pahuñcheñ vahāñ talak

fasl-e-ḳhizāñ meñ gul kā to aanā muhāl hai

bijlī hī kaash aa.e mirī āshiyāñ talak

kyūñkar na sar phire mirā us teġh ke liye

gardish sī justujū meñ hai marg-e-nishāñ talak

sau baar apnī fikr adam se pare ga.ī

lekin na pahuñchī yaar ke mu-e-bayāñ talak

us huur kā makān hai jannat se bhī pare

rizvāñ pahuñch sake na kabhī pāsbāñ talak

is darja fart-e-zo.af se ham pīchhe rah ga.e

pahuñchī na aah bhī jaras-e-kārvāñ talak

dil meñ hamāre us kī mohabbat ne ghar kiyā

pahuñchā hai is makān se jo lā-makāñ talak

allāh re dimāġh zarā dekh ai humā

aayā na be-talab sag-e-yār ustuḳhāñ talak

us maah ne jo sar mirā Thukrāyā paañv se

pahuñchā dimāġh aaj mirā āsmāñ talak

naḳhl-e-murād-e-yār huā aaj bārvar

sad shukr kaT ke sar mirā pahuñchā sināñ talak

phir jaa.e tiir aa ke vo bargashta baḳht huuñ

ruḳh phere dekh kar mujhe us kī kamāñ talak

marne ke ba.ad hai sag-e-jānāñ kā intizār

kah do humā na aa.e mirī ustuḳhāñ talak

sau baar aa ke maut bhī furqat meñ phir ga.e

bargashtagī nasīb kī kahiye kahāñ talak

'goyā' ye nā-tavānī kā ehsān mujh pe hai

aane diyā na yaar kā shikva zabāñ talak

bhula hai baad-e-marg mujhe dost yan talak

sag bhi na us ka aaya meri ustuKHan talak

go hum qafas se ja na sake bostan talak

uD uD ke rang-e-chehra gaya par wahan talak

bulbul hujum-e-gul hai chaman mein yahan talak

phulon se chha gaya hai tera aashiyan talak

kab pahunchi aah zoaf se gosh-e-butan talak

sau ja Thahar ke sine se aai zaban talak

parwaz pesh azin thi meri aasman talak

ab to chaman se ja na sakun aashiyan talak

aisa kiya zaif gham-e-intizar ne

aankhon ko meri bar hai KHwab-e-giran talak

aalim hun ilm-e-ishq ka main kar na ham-sari

ai andalib tu hai paDi bostan talak

us mah ke wasf se ye hua martaba buland

pahunchi meri ghazal ki zamin aasman talak

pas-e-adab raha hai junun mein bhi is qadar

aata hun sajde karta tere aastan talak

us mast ke hain gesuon ke silsile mein hum

saqi murid jis ka hai pir-e-mughan talak

rakkhen adab se panw na hum teri rah mein

bahar jab aap se hon to pahunchen wahan talak

fasl-e-KHizan mein gul ka to aana muhaal hai

bijli hi kash aae meri aashiyan talak

kyunkar na sar phire mera us tegh ke liye

gardish si justuju mein hai marg-e-nishan talak

sau bar apni fikr adam se pare gai

lekin na pahunchi yar ke mu-e-bayan talak

us hur ka makan hai jannat se bhi pare

rizwan pahunch sake na kabhi pasban talak

is darja fart-e-zoaf se hum pichhe rah gae

pahunchi na aah bhi jaras-e-karwan talak

dil mein hamare us ki mohabbat ne ghar kiya

pahuncha hai is makan se jo la-makan talak

allah re dimagh zara dekh ai huma

aaya na be-talab sag-e-yar ustuKHan talak

us mah ne jo sar mera Thukraya panw se

pahuncha dimagh aaj mera aasman talak

naKHl-e-murad-e-yar hua aaj barwar

sad shukr kaT ke sar mera pahuncha sinan talak

phir jae tir aa ke wo bargashta baKHt hun

ruKH phere dekh kar mujhe us ki kaman talak

marne ke baad hai sag-e-jaanan ka intizar

kah do huma na aae meri ustuKHan talak

sau bar aa ke maut bhi furqat mein phir gae

bargashtagi nasib ki kahiye kahan talak

'goya' ye na-tawani ka ehsan mujh pe hai

aane diya na yar ka shikwa zaban talak