bhuli-bisri baaten chhoDo ahd-e-gurezan lae kaun

bhūlī-bisrī bāteñ chhoḌo ahd-e-gurezāñ laa.e kaun

ham bhī qātil tum bhī qātil is par ab pachhtā.e kaun

aao baiTho bāteñ kar leñ man kā bojh to halkā ho

ham bhī haare tum bhī haare zaḳhmī dil bahlā.e kaun

ḳhaak hue ḳhāshāk hue jo sho.ala-ba-dāmāñ rahte haiñ

raakh meñ soī chiñgārī ab sho.aloñ sā lahkā.e kaun

na.e nagar meñ aañkh jo kholī raste raste bahke haiñ

apnī Dagar sab bhuul ga.e haiñ rāsta ab batlā.e kaun

aa.e kitne piir payambar kis ne un par kaan dharā

aag kī un din barkhā hogī us par niir bahā.e kaun

apnī khetī hiire motī man meñ Dher lagā.e haiñ

moh kī maarī duniyā meñ ab dāman ko phailā.e kaun

lahlahā karte saa.e meñ sab god meñ khelā karte the

sūkhe peḌ kī lakḌī haiñ ab dekho aag lagā.e kaun

raah meñ baiTheñ haar ke ye to kesh nahīñ dīvānoñ kā

dil se le kar paañv talak haiñ chhāloñ ko sahlā.e kaun

'rizvāñ' kitne saada ho tum apnā hī āzār liye

DhūñD rahe ho chāhne vaale bastī bastī paa.e kaun

bhuli-bisri baaten chhoDo ahd-e-gurezan lae kaun

hum bhi qatil tum bhi qatil is par ab pachhtae kaun

aao baiTho baaten kar len man ka bojh to halka ho

hum bhi haare tum bhi haare zaKHmi dil bahlae kaun

KHak hue KHashak hue jo shoala-ba-daman rahte hain

rakh mein soi chingari ab shoalon sa lahkae kaun

nae nagar mein aankh jo kholi raste raste bahke hain

apni Dagar sab bhul gae hain rasta ab batlae kaun

aae kitne pir payambar kis ne un par kan dhara

aag ki un din barkha hogi us par nir bahae kaun

apni kheti hire moti man mein Dher lagae hain

moh ki mari duniya mein ab daman ko phailae kaun

lahlaha karte sae mein sab god mein khela karte the

sukhe peD ki lakDi hain ab dekho aag lagae kaun

rah mein baiThen haar ke ye to kesh nahin diwanon ka

dil se le kar panw talak hain chhaalon ko sahlae kaun

'rizwan' kitne sada ho tum apna hi aazar liye

DhunD rahe ho chahne wale basti basti pae kaun