bhulne ki ho gai bekar har tadbir dekh

bhūlne kī ho ga.ī bekār har tadbīr dekh

rang sau dikhlā rahī hai ye tirī tasvīr dekh

jāntā huuñ ik samundar kī tamanna hai tujhe

aa mirī āñkhoñ meñ apne ḳhvāb kī tā۔bīr dekh

vo tujhī meñ hai nihāñ jis kī hai tujh ko justujū

ban ke rāñjhā aa.ine meñ apne aks-e-hīr dekh

jab milī manzil to merā ham-safar hī kho gayā

bad-nasībī is ko kahte haiñ mirī taqdīr dekh

ratjagoñ se rabt hai aur vasl kī ḳhvāhish nahīñ

ab ināyat kar rahī hai hijr kī tāsīr dekh

apne maazī se sabaq le aur mustaqbil sañvār

vaqt kī peshāniyoñ pe hai likhī tahrīr dekh

rū-ba-rū hai mai magar tū us ko chhū saktā nahīñ

pyaas kī hasrat se pahle paañv kī zanjīr dekh

ilm kī daulat ke aage ḳham haiñ tāj-o-taḳht bhī

sar jhukātī hai qalam ke rū-ba-rū shamshīr dekh

aib mere ginñe vaale ḳhud ko bhī parkhā kabhī

vaar se pahle ye behtar hai tū apnā tiir dekh

mujh ko paalā hai ġhazal ne māmtā kī chhāñv meñ

bas adab ke vāste hī hai mirī tauqīr dekh

haa.e kaisī ho ga.ī ahl-e-siyāsat kī zabāñ

bāñTtī insān ko hai un kī har taqrīr dekh

be-hisī ko toḌ de ab to pighal ai sang-dil

kam se kam tū 'sant' kī āñkhoñ se chhalkā niir dekh

bhulne ki ho gai bekar har tadbir dekh

rang sau dikhla rahi hai ye teri taswir dekh

jaanta hun ek samundar ki tamanna hai tujhe

aa meri aankhon mein apne KHwab ki ta۔bir dekh

wo tujhi mein hai nihan jis ki hai tujh ko justuju

ban ke ranjha aaine mein apne aks-e-hir dekh

jab mili manzil to mera ham-safar hi kho gaya

bad-nasibi is ko kahte hain meri taqdir dekh

ratjagon se rabt hai aur wasl ki KHwahish nahin

ab inayat kar rahi hai hijr ki tasir dekh

apne mazi se sabaq le aur mustaqbil sanwar

waqt ki peshaniyon pe hai likhi tahrir dekh

ru-ba-ru hai mai magar tu us ko chhu sakta nahin

pyas ki hasrat se pahle panw ki zanjir dekh

ilm ki daulat ke aage KHam hain taj-o-taKHt bhi

sar jhukati hai qalam ke ru-ba-ru shamshir dekh

aib mere ginne wale KHud ko bhi parkha kabhi

war se pahle ye behtar hai tu apna tir dekh

mujh ko pala hai ghazal ne mamta ki chhanw mein

bas adab ke waste hi hai meri tauqir dekh

hae kaisi ho gai ahl-e-siyasat ki zaban

banTti insan ko hai un ki har taqrir dekh

be-hisi ko toD de ab to pighal ai sang-dil

kam se kam tu 'sant' ki aankhon se chhalka nir dekh