bichchha hai palang aaj lab-e-baam kisi ka

bichchhā hai palang aaj lab-e-bām kisī kā

taḌpā.egā shab-bhar mujhe ārām kisī kā

chupke bhī raho 'bahr' na lo naam kisī kā

īmān kisī kā hai na islām kisī kā

niklā tire hāthoñ na kabhī kaam kisī kā

pahuñchāyā na tābūt bhī do-gām kisī kā

duniyā se ye nafrat hai ki ab dil meñ yahī hai

muñh dekheñ kisī kā na suneñ naam kisī kā

ye hoñTh na boleñ kalima bad ye duā hai

ye kaan suneñ koī na ilzām kisī kā

TuuTā jo kabhī shīsha-e-mai aa.ī ye āvāz

us bazm meñ ma.amūr huā jaam kisī kā

ham qaidiyoñ tak bād-e-sabā bhī nahīñ aa.e

pahuñchā.e kisī gul ko jo paiġhām kisī kā

duniyā se safar shabnam-o-ḳhurshīd ke mānind

hai sub.h kisī kā to sar-e-shām kisī kā

ham logoñ kī jo baat hai vo be-sar-o-pā hai

āġhāz kisī kā hai na anjām kisī kā

dīvāne haiñ vo log jo gul khāte haiñ us par

ġham-ḳhvār na hogā vo gul-andām kisī kā

duniyā ke ḳhayālāt ko dil meñ na jagah deñ

ḳhalvat-gah-e-mahbūb meñ kyā kaam kisī kā

hai shā.iroñ ke dil kā koī shāhid-e-ainī

mazmūn ko ham kahte haiñ paiġhām kisī kā

fariyād kī tāqat nahīñ ham jāñ-ba-laboñ ko

ab dil na dukhā.e vo dil-ārām kisī kā

sandal kī na bū jā.egī piiso ki jalāo

miTtā hai miTā.e se kahīñ naam kisī kā

duniyā se bhī uqbā se bhī sharminda rahe ham

kuchh ho na sakā 'bahr' sar-anjām kisī kā

bichchha hai palang aaj lab-e-baam kisi ka

taDpaega shab-bhar mujhe aaram kisi ka

chupke bhi raho 'bahr' na lo nam kisi ka

iman kisi ka hai na islam kisi ka

nikla tere hathon na kabhi kaam kisi ka

pahunchaya na tabut bhi do-gam kisi ka

duniya se ye nafrat hai ki ab dil mein yahi hai

munh dekhen kisi ka na sunen nam kisi ka

ye honTh na bolen kalima bad ye dua hai

ye kan sunen koi na ilzam kisi ka

TuTa jo kabhi shisha-e-mai aai ye aawaz

us bazm mein mamur hua jam kisi ka

hum qaidiyon tak baad-e-saba bhi nahin aae

pahunchae kisi gul ko jo paigham kisi ka

duniya se safar shabnam-o-KHurshid ke manind

hai subh kisi ka to sar-e-sham kisi ka

hum logon ki jo baat hai wo be-sar-o-pa hai

aaghaz kisi ka hai na anjam kisi ka

diwane hain wo log jo gul khate hain us par

gham-KHwar na hoga wo gul-andam kisi ka

duniya ke KHayalat ko dil mein na jagah den

KHalwat-gah-e-mahbub mein kya kaam kisi ka

hai shairon ke dil ka koi shahid-e-aini

mazmun ko hum kahte hain paigham kisi ka

fariyaad ki taqat nahin hum jaan-ba-labon ko

ab dil na dukhae wo dil-aram kisi ka

sandal ki na bu jaegi piso ki jalao

miTta hai miTae se kahin nam kisi ka

duniya se bhi uqba se bhi sharminda rahe hum

kuchh ho na saka 'bahr' sar-anjam kisi ka