bichhaD gaya hun mera karwan nahin milta

bichhaḌ gayā huuñ mirā kārvāñ nahīñ miltā

kahīñ kisī ke qadam kā nishāñ nahīñ miltā

ḳhalā meñ Daal diyā shauq-e-irtiqā ne mujhe

zamīñ bhī chhūT ga.ī āsmāñ nahīñ miltā

hazāroñ raaz chhupā.e hoñ apne siine meñ

kise sunā.ūñ koī rāzdāñ nahīñ miltā

na jaane kaun churā le gayā ḳhudā jaane

bahut dinoñ se dil-e-nā-tavāñ nahīñ miltā

tumhāre shahr meñ rahne ke vāste ham ko

lahad to miltī hai lekin makāñ nahīñ miltā

khaḌā hai dhuup meñ ik ajnabī udaas udaas

haveliyāñ haiñ bahut sā.ebāñ nahīñ miltā

hamāre daur ke qātil haiñ kitne sho.abda-gar

ab āstīñ pe lahū kā nishāñ nahīñ miltā

ajiib haal hai ham shā.irān-e-urdu kā

zabāñ milī hai magar ham-zabāñ nahīñ miltā

vahāñ pe umr guzārī hai ham ne ai 'rizvāñ'

ki saañs lene kā haq bhī jahāñ nahīñ miltā

bichhaD gaya hun mera karwan nahin milta

kahin kisi ke qadam ka nishan nahin milta

KHala mein Dal diya shauq-e-irtiqa ne mujhe

zamin bhi chhuT gai aasman nahin milta

hazaron raaz chhupae hon apne sine mein

kise sunaun koi raazdan nahin milta

na jaane kaun chura le gaya KHuda jaane

bahut dinon se dil-e-na-tawan nahin milta

tumhaare shahr mein rahne ke waste hum ko

lahad to milti hai lekin makan nahin milta

khaDa hai dhup mein ek ajnabi udas udas

haweliyan hain bahut saeban nahin milta

hamare daur ke qatil hain kitne shoabda-gar

ab aastin pe lahu ka nishan nahin milta

ajib haal hai hum shairan-e-urdu ka

zaban mili hai magar ham-zaban nahin milta

wahan pe umr guzari hai hum ne ai 'rizwan'

ki sans lene ka haq bhi jahan nahin milta