bichhaD ke un ke hum is ehtimal se bhi gae

bichhaḌ ke un ke ham is ehtimāl se bhī ga.e

bayān-e-ġham se ga.e arz-e-hāl se bhī ga.e

thī jin kī yaad se raushan ḳhayāl kī duniyā

vo aise rūThe bisāt-e-ḳhayāl se bhī ga.e

nigāheñ milne se mumkin hai pyaar aa jaa.e

ham un kī bazm meñ kuchh is ḳhayāl se bhī ga.e

unhoñ ne aa ke koī haal tak nahīñ pūchhā

banāvaTī hī sahī indimāl se bhī ga.e

dil un ko de ke bahut mutma.in hue ham bhī

ki roz roz kī ab dekh-bhāl se bhī ga.e

nigāh-e-lutf nahīñ to nigāh-e-qahr sahī

sitam to ye hai ham is ehtimāl se bhī ga.e

vo aa.e chīñ-ba-jabīñ is liye sar-e-mahfil

ham un se ab to javāb-o-savāl se bhī ga.e

dil ik piyāla thā miTTī kā vo bhī TuuT gayā

nigāh milte hī jām-e-sifāl se bhī ga.e

ḳhudā pe chhoḌ ke ai 'mauj' kashtī-e-ulfat

sukūn pā ga.e fikr-e-ma.āl se bhī ga.e

bichhaD ke un ke hum is ehtimal se bhi gae

bayan-e-gham se gae arz-e-haal se bhi gae

thi jin ki yaad se raushan KHayal ki duniya

wo aise ruThe bisat-e-KHayal se bhi gae

nigahen milne se mumkin hai pyar aa jae

hum un ki bazm mein kuchh is KHayal se bhi gae

unhon ne aa ke koi haal tak nahin puchha

banawaTi hi sahi indimal se bhi gae

dil un ko de ke bahut mutmain hue hum bhi

ki roz roz ki ab dekh-bhaal se bhi gae

nigah-e-lutf nahin to nigah-e-qahr sahi

sitam to ye hai hum is ehtimal se bhi gae

wo aae chin-ba-jabin is liye sar-e-mahfil

hum un se ab to jawab-o-sawal se bhi gae

dil ek piyala tha miTTi ka wo bhi TuT gaya

nigah milte hi jam-e-sifal se bhi gae

KHuda pe chhoD ke ai 'mauj' kashti-e-ulfat

sukun pa gae fikr-e-maal se bhi gae