bichhaDna yar se aasan bhi nahin hota

bichhaḌnā yaar se āsān bhī nahīñ hotā

phir aise jurm kā tāvān bhī nahīñ hotā

ye dukh nahīñ ki maiñ har ek se ulajhtā huuñ

ye fikr hai ki pashemān bhī nahīñ hotā

musībatoñ meñ use kaam aate dekhā hai

vo shaḳhs jis pe koī maan bhī nahīñ hotā

sunā hai us pe ka.ī jaan se bhī jaate haiñ

maiñ jaisī baat pe hairān bhī nahīñ hotā

hamārā rāsta kyoñ rokte haiñ sab rahzan

hamāre paas to sāmān bhī nahīñ hotā

har ek shai kī yahāñ qīmateñ muqarrar haiñ

yahāñ to muft meñ nuqsān bhī nahīñ hotā

ye kab kahā hai ki har aadmī farishta ho

sitam to ye hai ki insān bhī nahīñ hotā

mirā bhī dil hai kisī roz sair ko niklūñ

magar ye shahr to sunsān bhī nahīñ hotā

bichhaDna yar se aasan bhi nahin hota

phir aise jurm ka tawan bhi nahin hota

ye dukh nahin ki main har ek se ulajhta hun

ye fikr hai ki pasheman bhi nahin hota

musibaton mein use kaam aate dekha hai

wo shaKHs jis pe koi man bhi nahin hota

suna hai us pe kai jaan se bhi jate hain

main jaisi baat pe hairan bhi nahin hota

hamara rasta kyon rokte hain sab rahzan

hamare pas to saman bhi nahin hota

har ek shai ki yahan qimaten muqarrar hain

yahan to muft mein nuqsan bhi nahin hota

ye kab kaha hai ki har aadmi farishta ho

sitam to ye hai ki insan bhi nahin hota

mera bhi dil hai kisi roz sair ko niklun

magar ye shahr to sunsan bhi nahin hota