bigaDne se tumhaare kya kahun main kya bigaDta hai

bigaḌne se tumhāre kyā kahūñ maiñ kyā bigaḌtā hai

kalejā muñh ko aa jaatā hai dil aisā bigaḌtā hai

shab-e-ġham meñ paḌe tanhā tasallī dil kī karte haiñ

yahī aalam kā naqsha hai sadā bantā bigaḌtā hai

vo yaad aatā hai aalam vasl kī shab kā vo ārā.ish

vo kahnā chhū na is dam zulf kā halqā bigaḌtā hai

hamāre uTh ke jaane meñ tirī kyā baat bantī hai

hamāre yaañ ke rahne meñ tirā kyā kyā bigaḌtā hai

vo kuchh ho jaanā ranjish us parī se bātoñ bātoñ meñ

vo kahnā pher kar muñh ye to kuchh achchhā bigaḌtā hai

jo ba.ad-az-umr ḳhat likhkhā to ye taqdīr kā likhkhā

ibārat gar kahīñ bantī hai to ma.anā bigaḌtā hai

agar ḳhāmosh rahtā huuñ to jī par mere bantī hai

agar kuchh muñh se kahtā huuñ to vo kaisā bigaḌtā hai

sifārish par bigaḌ kar haa.e vo us shoḳh kā kahnā

manā letā use maiñ par mirā sheva bigaḌtā hai

'nizām' us kī ināyat hai to phir kis baat kā ġham hai

banātā hai vo jis kā kaam kab us kā bigaḌtā hai

bigaDne se tumhaare kya kahun main kya bigaDta hai

kaleja munh ko aa jata hai dil aisa bigaDta hai

shab-e-gham mein paDe tanha tasalli dil ki karte hain

yahi aalam ka naqsha hai sada banta bigaDta hai

wo yaad aata hai aalam wasl ki shab ka wo aaraish

wo kahna chhu na is dam zulf ka halqa bigaDta hai

hamare uTh ke jaane mein teri kya baat banti hai

hamare yan ke rahne mein tera kya kya bigaDta hai

wo kuchh ho jaana ranjish us pari se baaton baaton mein

wo kahna pher kar munh ye to kuchh achchha bigaDta hai

jo baad-az-umr KHat likhkha to ye taqdir ka likhkha

ibarat gar kahin banti hai to mana bigaDta hai

agar KHamosh rahta hun to ji par mere banti hai

agar kuchh munh se kahta hun to wo kaisa bigaDta hai

sifarish par bigaD kar hae wo us shoKH ka kahna

mana leta use main par mera shewa bigaDta hai

'nizam' us ki inayat hai to phir kis baat ka gham hai

banata hai wo jis ka kaam kab us ka bigaDta hai