bigaDta zaKHm-e-hunar aashkara karna paDa

bigaḌtā zaḳhm-e-hunar āshkārā karnā paḌā

hameñ bhī daad kā marham gavārā karnā paḌā

bahut havas thī mujhe rizq-e-sher kī lekin

jo mil rahā thā usī par guzārā karnā paḌā

khaḌī thī mere liye āñsuoñ kī bārish meñ

so terī yaad se milnā gavārā karnā paḌā

maiñ is se kam pe zamāna murīd kar letā

ḳhayāl-e-ishq meñ jitnā tumhārā karnā paḌā

milā na ek bhī aañsū durūn-e-chashm mujhe

so muñh chhupā ke dukhoñ se kināra karnā paḌā

jo ḳhvāb niiñd se bhī chhup ke dekhtā thā maiñ

kisī kī aañkh se us kā nazāra karnā paḌā

nigāh-e-yār ne kuchh aise aib DhūñDh liye

tamām kār-e-mohabbat dobāra karnā paḌā

ab us safar kī sa.ūbat kā kyā kaheñ jis meñ

qadam qadam pe hameñ istiḳhāra karnā paḌā

sambhālī jaatī nahīñ raushnī zamīñ se 'kabīr'

supurd-e-ḳhāk ye kaisā sitāra karnā paḌā

bigaDta zaKHm-e-hunar aashkara karna paDa

hamein bhi dad ka marham gawara karna paDa

bahut hawas thi mujhe rizq-e-sher ki lekin

jo mil raha tha usi par guzara karna paDa

khaDi thi mere liye aansuon ki barish mein

so teri yaad se milna gawara karna paDa

main is se kam pe zamana murid kar leta

KHayal-e-ishq mein jitna tumhaara karna paDa

mila na ek bhi aansu durun-e-chashm mujhe

so munh chhupa ke dukhon se kinara karna paDa

jo KHwab nind se bhi chhup ke dekhta tha main

kisi ki aankh se us ka nazara karna paDa

nigah-e-yar ne kuchh aise aib DhunDh liye

tamam kar-e-mohabbat dobara karna paDa

ab us safar ki saubat ka kya kahen jis mein

qadam qadam pe hamein istiKHara karna paDa

sambhaali jati nahin raushni zamin se 'kabir'

supurd-e-KHak ye kaisa sitara karna paDa