bigDi hui jahan mein usi ki sanwar gai

bigḌī huī jahāñ meñ usī kī sañvar ga.ī

jis kī nizām-e-dahr pe gahrī nazar ga.ī

bīmārī-e-firāq nasīhat ye kar ga.ī

bigḌī vahī to baat jo had se guzar ga.ī

marne ke vaqt ḳhair jo guzrī guzar ga.ī

tum aa ga.e to ab mirī miTTī sañvar ga.ī

ahbāb chārāgar ko du'ā de rahe haiñ kyoñ

shāyad marīz-e-ġham kī tabī'at Thahar ga.ī

jalva dikhā ke tuur pe rū-posh ho gayā

achchhe par ai hakīm tumhārī nazar ga.ī

'ālam nizām-e-ishq kā badlā burī tarah

jis samt merī maut kī uḌ kar ḳhabar ga.ī

maiñ kyā batā.ūñ jā ke rukī kis maqām par

merī nazar jo hadd-e-nazar se guzar ga.ī

qātil tirī nigāh meñ tezī ġhazab kī hai

bismil phir aaj hazrat-e-'bismil' ko kar ga.ī

bigDi hui jahan mein usi ki sanwar gai

jis ki nizam-e-dahr pe gahri nazar gai

bimari-e-firaq nasihat ye kar gai

bigDi wahi to baat jo had se guzar gai

marne ke waqt KHair jo guzri guzar gai

tum aa gae to ab meri miTTi sanwar gai

ahbab chaaragar ko du'a de rahe hain kyon

shayad mariz-e-gham ki tabi'at Thahar gai

jalwa dikha ke tur pe ru-posh ho gaya

achchhe par ai hakim tumhaari nazar gai

'alam nizam-e-ishq ka badla buri tarah

jis samt meri maut ki uD kar KHabar gai

main kya bataun ja ke ruki kis maqam par

meri nazar jo hadd-e-nazar se guzar gai

qatil teri nigah mein tezi ghazab ki hai

bismil phir aaj hazrat-e-'bismil' ko kar gai