bimar-e-hijr bistar-e-gham se agar uThe

bīmār-e-hijr bistar-e-ġham se agar uThe

āvāza-e-qubūl duā-e-sahar uThe

lākhoñ haiñ dād-ḳhvāh hazāroñ haiñ mudda.ī

kis tarah roz-e-hashr kisī kī nazar uThe

ai yaas ek ek kā lāzim hai faisla

dil ko biThā ke hijr meñ dard-e-jigar uThe

hai āsmāñ kī vajah se gardan jhukī huī

ye chhat jo ho buland to nāloñ kā sar uThe

majbūr ho rahā huuñ maiñ bār-e-ḳhayāl se

imkān meñ nahīñ hai ki zaanū se sar uThe

mumkin nahīñ ki ashk na āñkhoñ se hoñ ravāñ

bālīñ se koī mujh ko agar dekh kar uThe

madd-e-nazar huā hai unheñ imtihān-e-zabt

tūfān-e-ashk aaj na ai chashm-e-tar uThe

hai ibtidā se yuñhī nasheb-o-farāz-e-dahr

kyoñ dil na baiTh jaa.e jo dard-e-jigar uThe

'mas.ūd' chheḌ vasl kī karnā zarūr thī

ḳhāmosh bazm-e-yār se kyā soch kar uThe

bimar-e-hijr bistar-e-gham se agar uThe

aawaza-e-qubul dua-e-sahar uThe

lakhon hain dad-KHwah hazaron hain muddai

kis tarah roz-e-hashr kisi ki nazar uThe

ai yas ek ek ka lazim hai faisla

dil ko biTha ke hijr mein dard-e-jigar uThe

hai aasman ki wajah se gardan jhuki hui

ye chhat jo ho buland to nalon ka sar uThe

majbur ho raha hun main bar-e-KHayal se

imkan mein nahin hai ki zanu se sar uThe

mumkin nahin ki ashk na aankhon se hon rawan

baalin se koi mujh ko agar dekh kar uThe

madd-e-nazar hua hai unhen imtihan-e-zabt

tufan-e-ashk aaj na ai chashm-e-tar uThe

hai ibtida se yunhi nasheb-o-faraaz-e-dahr

kyon dil na baiTh jae jo dard-e-jigar uThe

'masud' chheD wasl ki karna zarur thi

KHamosh bazm-e-yar se kya soch kar uThe