bimar ho gaya hun shifa-KHana chahiye

bīmār ho gayā huuñ shifā-ḳhāna chāhiye

ye saarā shahr mujh ko bayābāna chāhiye

sāñsoñ kī zarb se na kaTegā hamārā habs

ham ko to ek puurā havā-ḳhāna chāhiye

yuuñ hī dikhā rahī hai mohabbat ke sabz baaġh

mere badan ko ruuh se harjāna chāhiye

tāḳhīr ho ga.ī to bikhar jā.egā badan

āġhosh-e-yār ab tujhe khul jaanā chāhiye

phir dāvat-e-gunāh milī ik nigāh se

phir merī pārsā.ī ko sharmānā chāhiye

vo jalva sāmne ho to kaisī duā-salām

bas dekhte hī kaam pe lag jaanā chāhiye

dekheñ to kaun jaatā hai mahmil meñ ḳhvāb ke

ta.abīr ke ġhazāl ko dauḌānā chāhiye

ūdham machā rahe haiñ bahut log shahr ke

'ehsās-jī' ko dasht se bulvānā chāhiye

bimar ho gaya hun shifa-KHana chahiye

ye sara shahr mujh ko bayabana chahiye

sanson ki zarb se na kaTega hamara habs

hum ko to ek pura hawa-KHana chahiye

yun hi dikha rahi hai mohabbat ke sabz bagh

mere badan ko ruh se harjaana chahiye

taKHir ho gai to bikhar jaega badan

aaghosh-e-yar ab tujhe khul jaana chahiye

phir dawat-e-gunah mili ek nigah se

phir meri parsai ko sharmana chahiye

wo jalwa samne ho to kaisi dua-salam

bas dekhte hi kaam pe lag jaana chahiye

dekhen to kaun jata hai mahmil mein KHwab ke

tabir ke ghazal ko dauDana chahiye

udham macha rahe hain bahut log shahr ke

'ehsas-ji' ko dasht se bulwana chahiye