binai se bahar kabhi andar mujhe dekhe

bīnā.ī se bāhar kabhī andar mujhe dekhe

mumkin hī nahīñ hai vo barābar mujhe dekhe

ho jaa.e kabhī raat mire dam se bhī raushan

vo sham.a-e-tamāshā jo ghaḌī-bhar mujhe dekhe

maiñ ḳhud meñ to maujūd hī mushkil se rahūñgā

har dekhne vaalā mire bāhar mujhe dekhe

DhūñDe koī mujh ko to isī ḳhāk-e-havas meñ

yā silsila-e-sail-e-havā par mujhe dekhe

māhaul hī kuchh ho chaman-e-ḳhvāb kā aisā

bulbul mujhe samjhe to gul-e-tar mujhe dekhe

ab dekhnā hī shart ye Thahrī hai ki yuuñ ho

maiñ manzar-e-nāyāb ko manzar mujhe dekhe

dariyā kī pazīrā.ī meñ shak to nahīñ lekin

ik lahar ho aisī bhī ki uTh kar mujhe dekhe

maiñ baar digar hī kahīñ aatā huuñ samajh meñ

jo dekhnā chāhe so mukarrar mujhe dekhe

merā nazar aanā hai 'zafar' baat hī kuchh aur

jo dekh nahīñ saktā vo aksar mujhe dekhe

binai se bahar kabhi andar mujhe dekhe

mumkin hi nahin hai wo barabar mujhe dekhe

ho jae kabhi raat mere dam se bhi raushan

wo shama-e-tamasha jo ghaDi-bhar mujhe dekhe

main KHud mein to maujud hi mushkil se rahunga

har dekhne wala mere bahar mujhe dekhe

DhunDe koi mujh ko to isi KHak-e-hawas mein

ya silsila-e-sail-e-hawa par mujhe dekhe

mahaul hi kuchh ho chaman-e-KHwab ka aisa

bulbul mujhe samjhe to gul-e-tar mujhe dekhe

ab dekhna hi shart ye Thahri hai ki yun ho

main manzar-e-nayab ko manzar mujhe dekhe

dariya ki pazirai mein shak to nahin lekin

ek lahar ho aisi bhi ki uTh kar mujhe dekhe

main bar digar hi kahin aata hun samajh mein

jo dekhna chahe so mukarrar mujhe dekhe

mera nazar aana hai 'zafar' baat hi kuchh aur

jo dekh nahin sakta wo aksar mujhe dekhe