bite hue mausam ki sada se bhi mile hain

biite hue mausam kī sadā se bhī mile haiñ

kuchh zaḳhm hameñ taaza havā se bhī mile haiñ

chubhte hue mā'nī se kahīñ phūTe haiñ chhāle

āzār kahīñ 'aks-e-navā se bhī mile haiñ

kahte haiñ ki jalte hue sāyoñ ko libāde

Dhalte hue sūraj kī qabā se bhī mile haiñ

jiine ke liye uTThe the āñdhī kī tarah ham

raste hameñ tūfān-e-balā se bhī mile haiñ

Thahre haiñ to aap apne se milne nahīñ paa.e

nikle haiñ to ham apne ḳhudā se bhī mile haiñ

jo ochhe piyāle the vo sairāb the 'vasfī'

jo zarf samundar the vo pyāse bhī mile haiñ

bite hue mausam ki sada se bhi mile hain

kuchh zaKHm hamein taza hawa se bhi mile hain

chubhte hue ma'ni se kahin phuTe hain chhaale

aazar kahin 'aks-e-nawa se bhi mile hain

kahte hain ki jalte hue sayon ko libaade

Dhalte hue suraj ki qaba se bhi mile hain

jine ke liye uTThe the aandhi ki tarah hum

raste hamein tufan-e-bala se bhi mile hain

Thahre hain to aap apne se milne nahin pae

nikle hain to hum apne KHuda se bhi mile hain

jo ochhe piyale the wo sairab the 'wasfi'

jo zarf samundar the wo pyase bhi mile hain