bijliyan kya kya girain hum pe is taqdir ne

bijliyāñ kyā kyā girā.īñ ham pe is taqdīr ne

dil ko ghāyal kar diyā qismat ke zālim tiir ne

ik sunahrā ḳhvāb in āñkhoñ ne dekhā thā kabhī

ġham diye kyā kyā hameñ us ḳhvāb kī ta.abīr ne

apne hī ghar se bujhā apnī umīdoñ kā charāġh

qatl kar Daalā hai ham ko apnī hī shamshīr ne

phir vahī bhūle fasāne ham ko yaad aane lage

tujh se baḌh kar ġham diye ham ko tirī tasvīr ne

ishq ko iksīr kahte haiñ jahāñ vaale magar

apnī duniyā ḳhaak kar Daalī hai is iksīr ne

bijliyan kya kya girain hum pe is taqdir ne

dil ko ghayal kar diya qismat ke zalim tir ne

ek sunahra KHwab in aankhon ne dekha tha kabhi

gham diye kya kya hamein us KHwab ki tabir ne

apne hi ghar se bujha apni umidon ka charagh

qatl kar Dala hai hum ko apni hi shamshir ne

phir wahi bhule fasane hum ko yaad aane lage

tujh se baDh kar gham diye hum ko teri taswir ne

ishq ko iksir kahte hain jahan wale magar

apni duniya KHak kar Dali hai is iksir ne