bikhar gae hain jo hum kaenat ki surat

bikhar ga.e haiñ jo ham kā.enāt kī sūrat

to jāvedāñ hī raheñge hayāt kī sūrat

jo musta'ār fazāoñ meñ saañs lete haiñ

na dekh pā.eñge mere sabāt kī sūrat

har ek zaḳhm-e-tamannā harā-bharā hai abhī

har ek zaḳhm hai zaḳhm-e-hayāt kī sūrat

yahī haiñ maslahat-āmeziyāñ zamāne kī

judā rahe haiñ jo din aur raat kī sūrat

miTā miTā ke zamāna banā rahā hai mujhe

ubhar rahā huuñ maiñ naqsh-e-hayāt kī sūrat

shikast shab ne na maanī abhī añdherā hai

abhī sahar pe musallat hai raat kī sūrat

raqam kiyā hai vahī kuchh lahū se ham ne bhī

milā hai jo bhī hameñ tajrabāt kī sūrat

charāġh apne lahū ke jalā ke ham ne 'azīm'

sahar-misāl banā dī hai raat kī sūrat

bikhar gae hain jo hum kaenat ki surat

to jawedan hi rahenge hayat ki surat

jo musta'ar fazaon mein sans lete hain

na dekh paenge mere sabaat ki surat

har ek zaKHm-e-tamanna hara-bhara hai abhi

har ek zaKHm hai zaKHm-e-hayat ki surat

yahi hain maslahat-ameziyan zamane ki

juda rahe hain jo din aur raat ki surat

miTa miTa ke zamana bana raha hai mujhe

ubhar raha hun main naqsh-e-hayat ki surat

shikast shab ne na mani abhi andhera hai

abhi sahar pe musallat hai raat ki surat

raqam kiya hai wahi kuchh lahu se hum ne bhi

mila hai jo bhi hamein tajrabaat ki surat

charagh apne lahu ke jala ke hum ne 'azim'

sahar-misal bana di hai raat ki surat