bikharti TuTti shab ka sitara rakh liya maine

bikhartī TūTtī shab kā sitāra rakh liyā maiñ ne

mire hisse meñ jo aayā ḳhasāra rakh liyā maiñ ne

hisāb-e-dostāñ karte to harf aatā ta.alluq par

uThā rakkhā use aur goshvāra rakh liyā maiñ ne

judā.ī to muqaddar thī mujhe ehsās thā lekin

kaf-e-ummīd par phir bhī sharāra rakh liyā maiñ ne

zarā sī buuñd jo raushan hai ab tak ḳhalvat-e-dil meñ

charāġh-e-shām terā isti.āra rakh liyā maiñ ne

mirī āñkhoñ meñ jo sayyāl ā.īnoñ ke TukḌe haiñ

unhīñ TukḌoñ pe maqtal kā nazāra rakh liyā maiñ ne

ḳhushī ḳhairāt kar dī aur zamāne bhar ke ranj o ġham

mire dil ko huā jitnā gavāra rakh liyā maiñ ne

mirī dariyā-dilī ne bhar diyā kaasa samundar kā

badan par ret hāthoñ meñ kināra rakh liyā maiñ ne

bikharti TuTti shab ka sitara rakh liya main ne

mere hisse mein jo aaya KHasara rakh liya main ne

hisab-e-dostan karte to harf aata talluq par

uTha rakkha use aur goshwara rakh liya main ne

judai to muqaddar thi mujhe ehsas tha lekin

kaf-e-ummid par phir bhi sharara rakh liya main ne

zara si bund jo raushan hai ab tak KHalwat-e-dil mein

charagh-e-sham tera istiara rakh liya main ne

meri aankhon mein jo sayyal aainon ke TukDe hain

unhin TukDon pe maqtal ka nazara rakh liya main ne

KHushi KHairaat kar di aur zamane bhar ke ranj o gham

mere dil ko hua jitna gawara rakh liya main ne

meri dariya-dili ne bhar diya kasa samundar ka

badan par ret hathon mein kinara rakh liya main ne