bikte hain shahr mein gul-e-be-Khaar har taraf

bikte haiñ shahr meñ gul-e-be-ḳhār har taraf

hai bāġhbāñ kī garmī-e-bāzār har taraf

kyā fasl-e-gul phir aa.ī jo karte haiñ zamzama

dām-e-qafas meñ murġh-e-giraftār har taraf

koThe pe us ke pheñkūñ maiñ kis raah se kamand

kam-baḳht pāsbāñ to haiñ bedār har taraf

tode jahāñ the us ke shahīdoñ kī ḳhaak ke

tiir us ne maare naaz se do-chār har taraf

jab us kī barq-e-husn se parda huā hai vā

zaa.e hue haiñ tālib-e-dīdār har taraf

āshiq ko us galī se nikāleñ the jab ba-zor

paḌtī thī chashm-e-hasrat-e-dīdār har taraf

dāvat hai kis kī bazm-e-falak meñ jo kab se haiñ

āñkheñ lagā.e raḳhna-e-dīvār har taraf

sābit bachā na kāfir o dīñ-dār tak koī

teġh-e-nigah ne us kī kiye vaar har taraf

saude meñ justujū ke tirī ai matā-e-husn

sar mārte phireñ haiñ ḳharīdār har taraf

parvāz kā jo shauq hai bulbul ke musht par

kunj-e-qafas meñ uḌte haiñ nā-chār har taraf

hairāñ huuñ maiñ ki kis kā ye kūcha hai jis ke biich

TukḌe hue paḌe haiñ tarah-dār har taraf

ġhauġhā hai sharq o ġharb o junūb o shumāl meñ

fitne jagā ga.ī tirī raftār har taraf

go maiñ huā muqīm to kyā Dar hai 'mus.hafī'

sair o safar meñ haiñ mire ash.ār har taraf

bikte hain shahr mein gul-e-be-KHar har taraf

hai baghban ki garmi-e-bazar har taraf

kya fasl-e-gul phir aai jo karte hain zamzama

dam-e-qafas mein murgh-e-giraftar har taraf

koThe pe us ke phenkun main kis rah se kamand

kam-baKHt pasban to hain bedar har taraf

tode jahan the us ke shahidon ki KHak ke

tir us ne mare naz se do-chaar har taraf

jab us ki barq-e-husn se parda hua hai wa

zae hue hain talib-e-didar har taraf

aashiq ko us gali se nikalen the jab ba-zor

paDti thi chashm-e-hasrat-e-didar har taraf

dawat hai kis ki bazm-e-falak mein jo kab se hain

aankhen lagae raKHna-e-diwar har taraf

sabit bacha na kafir o din-dar tak koi

tegh-e-nigah ne us ki kiye war har taraf

saude mein justuju ke teri ai mata-e-husn

sar marte phiren hain KHaridar har taraf

parwaz ka jo shauq hai bulbul ke musht par

kunj-e-qafas mein uDte hain na-chaar har taraf

hairan hun main ki kis ka ye kucha hai jis ke bich

TukDe hue paDe hain tarah-dar har taraf

ghaugha hai sharq o gharb o junub o shumal mein

fitne jaga gai teri raftar har taraf

go main hua muqim to kya Dar hai 'mushafi'

sair o safar mein hain mere ashaar har taraf