bina dekhe sunahre KHwab ka naqsha bana Dala

binā dekhe sunahre ḳhvāb kā naqsha banā Daalā

tasavvur āshiqī kā aap ne achchhā banā Daalā

ġhazab kā khel dikhlāyā hai jādūgar bahāroñ ne

chhupā kar sāya-e-gul meñ mujhe kāñTā banā Daalā

maiñ ab apne tasavvur meñ hamesha qais rahtā huuñ

ye kis lailā ne mere zehn ko sahrā banā Daalā

khurach kar zard talvoñ se bahut lambī masāfat ko

bilā unvān ise chhoTā sā ik qissa banā Daalā

kahāñ ab ḳhuun rulvāte haiñ us ke ġham mujhe 'rizvān'

usī kī be-niyāzī ne to be-parvā banā Daalā

bina dekhe sunahre KHwab ka naqsha bana Dala

tasawwur aashiqi ka aap ne achchha bana Dala

ghazab ka khel dikhlaya hai jadugar bahaaron ne

chhupa kar saya-e-gul mein mujhe kanTa bana Dala

main ab apne tasawwur mein hamesha qais rahta hun

ye kis laila ne mere zehn ko sahra bana Dala

khurach kar zard talwon se bahut lambi masafat ko

bila unwan ise chhoTa sa ek qissa bana Dala

kahan ab KHun rulwate hain us ke gham mujhe 'rizwan'

usi ki be-niyazi ne to be-parwa bana Dala