bina yahi thi zamane mein dil lagane ki

binā yahī thī zamāne meñ dil lagāne kī

kahāniyāñ banīñ lākhoñ mire fasāne kī

ye raah dekhtī hai kab se un ke aane kī

mirī nazar ko ḳhabar kuchh nahīñ bahāne kī

koī havas na kare un se dil lagāne kī

likhī ga.ī yahī surḳhī mire fasāne kī

kahīñ jo shīsha-o-sāġhar ko ham ne dekh liye

nazar meñ phir ga.ī sūrat sharāb-ḳhāne kī

bachegā aap na fasl-e-bahār meñ dāman

kisī ko fikr ho kyā dhajjiyāñ uḌāne kī

sañbhal kar aap suneñ mujh se dāstān-e-firāq

bayān-e-hashr hai tamhīd is fasāne kī

asīr-e-zulf hilātā hai paañv kī zanjīr

kahīñ na gir paḌe dīvār qaid-ḳhāne kī

kuchh aur ban na paḌī un se ho ga.e vo ḳhamosh

jab aa.ī hashr meñ baarī mire fasāne kī

ye kis ke muñh meñ zabāñ hai jo kah sake 'bismil'

mirī zabān nahīñ 'dāġh' ke gharāne kī

bina yahi thi zamane mein dil lagane ki

kahaniyan banin lakhon mere fasane ki

ye rah dekhti hai kab se un ke aane ki

meri nazar ko KHabar kuchh nahin bahane ki

koi hawas na kare un se dil lagane ki

likhi gai yahi surKHi mere fasane ki

kahin jo shisha-o-saghar ko hum ne dekh liye

nazar mein phir gai surat sharab-KHane ki

bachega aap na fasl-e-bahaar mein daman

kisi ko fikr ho kya dhajjiyan uDane ki

sanbhal kar aap sunen mujh se dastan-e-firaq

bayan-e-hashr hai tamhid is fasane ki

asir-e-zulf hilata hai panw ki zanjir

kahin na gir paDe diwar qaid-KHane ki

kuchh aur ban na paDi un se ho gae wo KHamosh

jab aai hashr mein bari mere fasane ki

ye kis ke munh mein zaban hai jo kah sake 'bismil'

meri zaban nahin 'dagh' ke gharane ki