bistar-e-karb pe jab nind jalai maine

bistar-e-karb pe jab niiñd jalā.ī maiñ ne

tab kisī ḳhvāb kī buniyād uThā.ī maiñ ne

zaḳhm aise the ki har shaḳhs ke aage rakkhe

baat aisī thī ki ḳhud se bhī chhupā.ī maiñ ne

hurmat-e-ġham ke liye ḳhud ko aziyyat baḳhshī

phir usī dard se taskīn bhī paa.ī maiñ ne

maiñ ne zaḳhmoñ ko kuredā unheñ taaza rakkhā

tab kahīñ dasht meñ kī naġhma-sarā.ī maiñ ne

apnī khiḌkī se yūñhī ḳhud ko pukārā kal shab

aur phir ḳhud ko vo āvāz sunā.ī maiñ ne

jaane vaale se rag-e-jāñ kā bhī rishta thā 'samīr'

ye samajhne meñ bahut der lagā.ī maiñ ne

bistar-e-karb pe jab nind jalai main ne

tab kisi KHwab ki buniyaad uThai main ne

zaKHm aise the ki har shaKHs ke aage rakkhe

baat aisi thi ki KHud se bhi chhupai main ne

hurmat-e-gham ke liye KHud ko aziyyat baKHshi

phir usi dard se taskin bhi pai main ne

main ne zaKHmon ko kureda unhen taza rakkha

tab kahin dasht mein ki naghma-sarai main ne

apni khiDki se yunhi KHud ko pukara kal shab

aur phir KHud ko wo aawaz sunai main ne

jaane wale se rag-e-jaan ka bhi rishta tha 'samir'

ye samajhne mein bahut der lagai main ne