bistar ki shikan aas ki shahnai Dase hai

bistar kī shikan aas kī shahnā.ī Dase hai

ik dard ubhar aa.e hai tanhā.ī Dase hai

jab dekhūñ maiñ ā.īne meñ murjhā.ī sī sūrat

darpan se ubhar kar tirī añgḌā.ī Dase hai

muskān vo matvālī adā surḳhī laboñ kī

nainoñ kī tirī jhiil sī gahrā.ī Dase hai

gulshan hai sarāpā ai mirī jān-e-ġhazal tū

nāgin sī magar zulf jo lahrā.ī Dase hai

maiñ tujh se akele meñ bhī mil saktā huuñ lekin

ilzām Darā.e mujhe rusvā.ī Dase hai

le aatī haiñ ḳhushbū sī churā kar tirī yādeñ

tanhā.ī ke aalam meñ ye purvā.ī Dase hai

dālān to sāgaun ke pattoñ se aTe haiñ

aur qabr sī sunsān ye añgnā.ī Dase hai

pāgal hai dīvāna hai vo mastāna sitamgar

phūloñ kā dahan bhañvrā sā harjā.ī Dase hai

is dard-e-mohabbat meñ nahīñ tujh se shikāyat

mujh ko to mire pyaar kī gahrā.ī Dase hai

banjar hai zamīñ desh kī dil kaise sukūñ paa.e

bāzār kī baḌhtī huī mahñgā.ī Dase hai

hai nazm tū 'anvar' kī rubā.ī bhī ġhazal bhī

ai jān-e-ġhazal terī shanāsā.ī Dase hai

bistar ki shikan aas ki shahnai Dase hai

ek dard ubhar aae hai tanhai Dase hai

jab dekhun main aaine mein murjhai si surat

darpan se ubhar kar teri angDai Dase hai

muskan wo matwali ada surKHi labon ki

nainon ki teri jhil si gahrai Dase hai

gulshan hai sarapa ai meri jaan-e-ghazal tu

nagin si magar zulf jo lahrai Dase hai

main tujh se akele mein bhi mil sakta hun lekin

ilzam Darae mujhe ruswai Dase hai

le aati hain KHushbu si chura kar teri yaaden

tanhai ke aalam mein ye purwai Dase hai

dalan to sagaun ke patton se aTe hain

aur qabr si sunsan ye angnai Dase hai

pagal hai diwana hai wo mastana sitamgar

phulon ka dahan bhanwra sa harjai Dase hai

is dard-e-mohabbat mein nahin tujh se shikayat

mujh ko to mere pyar ki gahrai Dase hai

banjar hai zamin desh ki dil kaise sukun pae

bazar ki baDhti hui mahngai Dase hai

hai nazm tu 'anwar' ki rubai bhi ghazal bhi

ai jaan-e-ghazal teri shanasai Dase hai