biTha ke dil mein giraya gaya nazar se mujhe

biThā ke dil meñ girāyā gayā nazar se mujhe

dikhāyā turfa-tamāsha balā ke ghar se mujhe

nazar jhukā ke uThā.ī thī jaise pahlī baar

phir ek baar to dekho usī nazar se mujhe

hamesha bach ke chalā huuñ maiñ aam rāhoñ se

haTā sakā na koī merī rahguzar se mujhe

hayāt jis kī amānat hai sauñp duuñ us ko

utārnā hai ye qarza bhī apne sar se mujhe

subū na jaam na miinā se mai pilā be-shak

pilā.e jā mire saaqī yūñhī nazar se mujhe

jo baat hotī hai dil meñ vo kah guzartā huuñ

nahīñ hai koī ġharaz ahl-e-ḳhair-o-shar se mujhe

na dair se na haram se na mai-kade se milā

sukūn-e-rūh milā hai jo tere dar se mujhe

kisī kī rāh-e-mohabbat meñ baḌhtā jaatā huuñ

na rāhzan se ġharaz hai na rāhbar se mujhe

zarā to soch hiqārat se dekhne vaale

zamāna dekh rahā hai tirī nazar se mujhe

zamāna merī nazar se to gir gayā lekin

girā sakā na zamāna tirī nazar se mujhe

ye rañg-o-nūr kā 'gulzār' dahr-e-fānī hai

yahī payām milā umr-e-muḳhtasar se mujhe

biTha ke dil mein giraya gaya nazar se mujhe

dikhaya turfa-tamasha bala ke ghar se mujhe

nazar jhuka ke uThai thi jaise pahli bar

phir ek bar to dekho usi nazar se mujhe

hamesha bach ke chala hun main aam rahon se

haTa saka na koi meri rahguzar se mujhe

hayat jis ki amanat hai saunp dun us ko

utarna hai ye qarza bhi apne sar se mujhe

subu na jam na mina se mai pila be-shak

pilae ja mere saqi yunhi nazar se mujhe

jo baat hoti hai dil mein wo kah guzarta hun

nahin hai koi gharaz ahl-e-KHair-o-shar se mujhe

na dair se na haram se na mai-kade se mila

sukun-e-ruh mila hai jo tere dar se mujhe

kisi ki rah-e-mohabbat mein baDhta jata hun

na rahzan se gharaz hai na rahbar se mujhe

zara to soch hiqarat se dekhne wale

zamana dekh raha hai teri nazar se mujhe

zamana meri nazar se to gir gaya lekin

gira saka na zamana teri nazar se mujhe

ye rang-o-nur ka 'gulzar' dahr-e-fani hai

yahi payam mila umr-e-muKHtasar se mujhe