boiye mazra-e-dil mein jo inayat ke bij

boiye mazra-e-dil meñ jo ināyāt ke biij

to na hoñ sabz kabhī apnī shikāyāt ke biij

ham ne is mazra.a-e-hastī meñ kiye haiñ jo amal

ek din khīñcheñge sar un kī mukāfāt ke biij

aah dahqān-e-falak kī kahūñ kyā bad-tuḳhmī

ḳhāk-e-adām meñ ye nit bove hai āfāt ke biij

bāġhbāñ jab ta.iiñ haath aave tire bazr-ul-banj

merī turbat pe na bo aur nabātāt ke biij

valad-ul-qahba se pūchho na, tirī zaat hai kyā

biij meñ us ke haiñ maḳhlūt ka.ī zaat ke biij

daaġh siine ke mire turfa dikhāte haiñ bahār

haiñ ye bo.e hue kis naḳhl-e-tilismāt ke biij

bistar-e-shaiḳh pe jo koñch kī phalliyāñ niklīñ

the chhupā.e hue shāyad usī bad-zāt ke biij

un ko kyā hove hai juz rizq-e-pareshāñ hāsil

jā-ba-jā bote phireñ haiñ jo mulāqāt ke biij

'mus.hafī' is se bhī behtar ġhazal ik aur sunā

vādī-e-fikr meñ bo kar tū ḳhayālāt ke biij

boiye mazra-e-dil mein jo inayat ke bij

to na hon sabz kabhi apni shikayat ke bij

hum ne is mazra-e-hasti mein kiye hain jo amal

ek din khinchenge sar un ki mukafat ke bij

aah dahqan-e-falak ki kahun kya bad-tuKHmi

KHak-e-adam mein ye nit bowe hai aafat ke bij

baghban jab tain hath aawe tere bazr-ul-banj

meri turbat pe na bo aur nabaatat ke bij

walad-ul-qahba se puchho na, teri zat hai kya

bij mein us ke hain maKHlut kai zat ke bij

dagh sine ke mere turfa dikhate hain bahaar

hain ye boe hue kis naKHl-e-tilismat ke bij

bistar-e-shaiKH pe jo konch ki phalliyan niklin

the chhupae hue shayad usi bad-zat ke bij

un ko kya howe hai juz rizq-e-pareshan hasil

ja-ba-ja bote phiren hain jo mulaqat ke bij

'mushafi' is se bhi behtar ghazal ek aur suna

wadi-e-fikr mein bo kar tu KHayalat ke bij